وزیراعلیٰ سندھ کے حکم کے باوجودگلستان جوہر کے کارکنان کو تاحال رہا نہیں کیاگیا ، امین الحق

کراچی ۔۔۔ 19، اگست 2016ء

متحدہ قومی موومنٹ کی رابطہ کمیٹی کے رکن سید امین الحق نے وزیراعلیٰ سندھ سید مراد علی شاہ کے احکامات کے باوجود ایم کیوایم گلستان جوہر کے کارکنان کو رہا نہ کرنے کی سخت ترین الفاظ میں مذمت کی ہے ۔ ایک بیان میں انہوں نے کہاکہ ایم کیوایم اور مہاجردشمنی میں قانون نافذ کرنے والے ادارے کی جانب سے صوبہ سندھ کے منتخب وزیراعلیٰ کے احکامات کو بھی نظرانداز کرکے آئین اورقانون کی دھجیاں بکھیری جارہی ہیں۔انہوں نے کہاکہ مورخہ16 ، اگست کو رینجرز نے گلستان جوہر میں ایم کیوایم کے ٹاؤن آفس میں زبردستی گھس کرقرآن خوانی کے اجتماع کے شرکاء کو بہیمانہ تشددکا نشانہ بنانے کے بعد کنٹونمنٹ بورڈ کے حق پرست کونسلر ذیشان بشیر،ایم کیوایم گلستان جوہر ٹاؤن کمیٹی کے رکن انوارالحسن ، یوسی کمیٹی کے ارکان اظہرقریشی، فیصل وہاب اورکارکن طلحہٰ کو گرفتارکرلیاتھا۔ میڈیا میں شائع ونشر ہونے والی اطلاعات کے مطابق وزیر اعلیٰ سندھ سیدمرادعلی شاہ نے ان بے گناہ افراد کی گرفتاری کا نوٹس لیتے ہوئے تمام گرفتارشدگان کی رہائی کا حکم دیا تھا لیکن وزیراعلیٰ سندھ کے احکامات کے باوجود ان گرفتارشدگان کو تاحال رہا نہیں کیاگیا ہے جس کی جتنی بھی مذمت کی جائے کم ہے ۔ سید امین الحق نے وفاقی وصوبائی حکومتوں سے مطالبہ کیاکہ ایم کیوایم کے تمام گرفتارشدگان کو فی الفور رہا کیاجائے اور تمام لاپتہ کارکنان کی باحفاظت بازیابی کو یقینی بنایاجائے۔