لیاقت آباد میں مسلح دہشت گردوں کی فائرنگ سے ایم کیوایم کے سینئر کارکن محمد نسیم اور ہمدرد محمد شبیر شہید ہوگئے

کراچی۔۔۔15 اپریل 2014ء

لیاقت آباد کے علاقے میں مسلح دہشت گردوں نے فائرنگ کرکے ایم کیوایم کے ایک کارکن اورایک ہمدرد کوشہید اورتیسرے کارکن کوزخمی کردیا۔ تفصیلات کے مطابق منگل کی شب لیاقت آبادیونٹ 162کے علاقے میں ایم کیوایم لیبرڈیژن واٹر بورڈ یونٹ کے کارکن ارشدنقوی کی دکان پرایم کیوایم کی مرکزی پنجاب کمیٹی کے سابق رکن ،لیاقت آباد سیکٹرکے سابق سیکٹرممبراور سینئر کارکن محمد نسیم اورایم کیوایم کے ایک ہمدردمحمدشبیر بیٹھے ہوئے تھے کہ موٹرسائیکلوں پر سوارمسلح دہشت گردوں نے اچانک حملہ کرکے اندھادھند فائرنگ کردی۔ اس وحشیانہ فائرنگ کے نتیجے میں سینئرکارکن محمد نسیم اور ہمدرد محمد شبیر شہید ہوگئے جبکہ محمد ارشد نقوی شدیدزخمی ہوگئے جنہیں فوری طورپرعباسی شہیداسپتال لے جایاگیا جہاں ان کی حالت نازک بتائی جاتی ہے ۔ واقعہ کی اطلاع ملتے ہی ایم کیوایم کی رابطہ کمیٹی کے رکن رشیدگوڈیل، رابطہ کمیٹی کے معاون رکن اظہاراحمدخان، تنظیمی کمیٹی کے ارکان رضوان صدیقی، علیم الرحمن، حق پرست ارکان سندھ اسمبلی محمدوسیم، خالدبن ولایت، عظیم فاروقی اوردیگرذمہ داران فوری طور پرعباسی شہید اسپتال پہنچ گئے اورواقعہ کی تفصیلات معلوم کیں اورواقعہ پر شدت غم سے نڈھال کارکنوں کودلاسہ دیا۔ محمد نسیم شہید کی رہائش گلستان جوہرمیں تھی جبکہ شہیدہونے والے ایم کیوایم کے ہمدردمحمدشبیر آپس میں دوست تھے۔ دہشت گردی کے اس واقعہ کے باعث علاقے کے عوام میں سخت اشتعال اورغم وغصہ پایاجاتاہے ۔