انڈین ٹی وی چینل کو انٹرویو د ینے سےمحترمہ نورین نیازی غدار اورملک دشمن کیسے ہوگئیں؟
سیاسی مخالفت کی بنیاد پر لوگوں کوغدارقراردینے کاسلسلہ بند ہوناچاہیے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
آج صبح سے ہی مجھ سے لوگوں نے سینکڑوں فون کال اور پیغامات کے ذریعے سوال کیاکہ جیل میں مقید تحریک انصاف کے بانی عمران خان کی بہن محترمہ نورین نیازی صاحبہ نے انڈین ٹی وی چینل کو انٹرویو دیا ہے کیا وہ غدار اورملک دشمن ہوگئیں؟
ایک وقت تھا جب الطاف حسین کوحالات کےجبرکے تحت جلاوطن ہونا پڑا، میڈیا پر ایم کیوایم کا مؤقف نشرو شائع کرنے پر پابندی عائد کردی گئی تھی اُس وقت الطاف حسین کو اپنا مؤقف بیان کرنے اور اپنا پیغام پھیلانے کیلئے جو بھی میڈیم ملامیں نے اپناپیغام پھیلانے کی کوشش کی، دنیا کے تقریباً ہرملک کے ٹیلی ویژن اور اخبارکو الطاف حسین انٹرویو دے چکاہے اسی طرح میں نے انڈین میڈیا کو بھی انٹرویوز دیئے۔
عمران خان کے بڑے بڑے فالوورز، وی لاگرز اوریوٹیوبرز کی جانب سے کہاگیاکہ محترمہ نورین نیازی صاحبہ امریکی، برطانوی یا کسی بھی مغربی میڈیا کو انٹرویو دے دیتیں لیکن انہیں انڈین چینل کو انٹرویو نہیں دینا چاہیے تھا۔
میرا سوال ہے کہ انڈین ٹی وی چینل یا میڈیا کو انٹرویو دینے میں کیاحرج ہے؟
اس قسم کااعتراض کرنےوالےالطاف حسین پر بھی اعتراض کرتےرہے ہیں کہ الطاف حسین نے انڈین میڈیا کوانٹرویو کیوں دیا، الطاف حسین نے بھارت جاکر تقریر کیوں کی۔
میں نے 2004ء میں وہاں کے بڑے اخبار ہندوستان ٹائمز کی دعوت پر بھارت کادورہ کیاتھا اور وہا ں میرے علاوہ عمران خان بھی ہندوستان ٹائمز کی دعوت پر تشریف لائے تھے لیکن مجھے ہندوستان ٹائمزکے زیراہتمام کانفرنس میں Key note اسپیکر کی حیثیت سے مدعو کیاگیا تھا۔
اس کانفرنس میں، میں نے کہاتھا کہ ”برصغیرکی تقسیم انسانی تاریخ کی سب سے بڑی غلطی ہے“ میں آج بھی اپنے اُس مؤقف پر قائم ہوں کیونکہ برصغیرکی تقسیم سے ہندوستان کے مسلمانوں کی طاقت پہلے دوجغرافیے پھرتین جغرافیے میں تقسیم ہوگئی۔
یہ میرفلاسفی، میرا تجزیہ اورمیرا خیال ہے جس سے اختلاف کیاجاسکتا ہے لیکن آپ کوچاہیے کہ میرے اس خیال کودلائل سے شکست دیں یا اپنی شکست تسلیم کرنے کیلئے تیارہوجائیں۔ یہ میری فلاسفی ہے اور جس طرح آپ کمیونزم اور کیپٹل ازم کوپسند بھی کرسکتے ہیں اوراس کی مخالفت بھی کرسکتے ہیں،یہ آپ کاحق ہے۔میں نے دوقومی نظریئے کو ایک دھوکہ قراردیا اورمیری یہ فلاسفی صحیح ثابت ہوگئی کہ کیونکہ اگر دوقومی نظریہ درست تھا تو پھر برصغیرمیں تیسری قوم کہاں سے آگئی؟
میراسوال ہے کہ محترمہ نورین نیاز ی نے انڈین ٹی وی چینل کو انٹرویو دے دیا تو کون سی قیامت آگئی؟ اس بنیادپر محترمہ نورین نیازی کو غدار کیوں قراردیاجارہاہے؟ نورین نیازی کوغدار قراردینے کا مطلب عمران خان کوغدار قراردینا ہے لیکن مجھے بتایاجائے کہ پاکستان کا کون سا سیاسی یامذہبی رہنما ہے جس نے انڈین ٹی وی چینل کو انٹرویو نہیں دیا ہو؟ کون سے معروف صحافی ہیں جو انڈین چینل پر تبصرہ یاتجزیہ نہیں کرتے؟کیانوازشریف سمیت کئی سیاسی رہنماؤں نے انڈین چینلز کوانٹرویونہیں دیے؟ ایک طرف تو انڈین ٹی وی کو انٹرویو دینے کوگناہ کہاجارہاہے جبکہ دوسری طرف پاکستان کے ہرگھرمیں بھارتی فلمیں دیکھی جاتی ہیں،بھارتی گانے سنے جا تے ہیں، اگردشمن ملک سے آپ کو نفرت اوراپنے ملک سے محبت ہے توانڈین فلمیں دیکھنا ہی بندکردیں۔ یہ حقیقت ہے کہ جب تک پاکستان کے سینما گھروں میں بھارتی فلمیں دکھائی جاتی تھیں، سینما گھرآباد تھے لیکن جب سے بھارتی فلمیں چلانے پرپابندی لگائی گئی ہے، پاکستانی سینماگھرویران ہوگئے ہیں۔
کسی چینل کو انٹرویو دینے کی بنیاد پر کسی کو غدار نہ کہاجائے، میرا سوال ہے کہ کیامیاں نوازشریف کے صاحبزادے بھارتی وزیراعظم کے نام خطوط نہیں لکھے تھے؟
یادرکھئے کہ یہ قانون فطرت ہے کہ انسان اپنی بقاء کیلئے وہ راستہ بھی اختیارکرنے پر مجبورہوجاتا ہے جو وہ اختیار نہیں کرناچاہتا۔ ایک طرف توآپ حق دفاع (Self defence) کے قانون کو اپنا حق سمجھتے ہیں توپھر اُسے الطاف حسین، محترمہ نورین نیازی اورعمران خان یاکسی اور کا حق کیوں نہیں سمجھتے؟
میں سمجھتاہوں کہ سیاسی مخالفت کی بنیاد پر لوگوں کوغدار قراردینے کاسلسلہ بند ہوناچاہیے، غداری کے سرٹیفکیٹ جاری کرنے والی فیکٹریاں بندہوناچاہئیں۔
الطاف حسین
ٹک ٹاک پر 354ویں فکری نشست سے خطاب
29، نومبر2025ء