سیدعلی رضاعابدی کا قتل انتہائی قابل مذمت اورافسوسناک ہے۔ الطاف حسین

متحدہ قومی موومنٹ کے بانی و قائدجناب الطاف حسین نے ایم کیوایم کے سابق رکن قومی اسمبلی سیدعلی رضاعابدی کے قتل کی شدیدالفاظ میں مذمت کرتے ہوئے کہاہے کہ یہ واقعہ انتہائی قابل مذمت اورافسوسناک ہے۔اپنے بیان میں انہوں نے کہاکہ علی رضا عابدی کے قتل میں انہی قوتوں کاہاتھ معلوم ہوتا ہے جو ماضی میں بھی اپنے مذموم مقاصد کے لئے اسی طرح کے واقعات کرواکرکرمنلائزیشن پالیسی کے تحت اس کاالزام دوسروں پر لگا کر ان کے خلاف کارروائی کا جواز پیدا کرتی آئی ہیں۔جناب الطاف حسین نے کہاکہ علی رضاعابدی اگرچہ ایم کیوایم سے علیحدہ ہوگئے تھے لیکن وہ سوشل میڈیاپر ایم کیوایم خصوصاً الطاف حسین کی حمایت میں جن خیالات کا اظہار کررہے تھے وہ یقیناًان قوتوں کوپسندنہیں تھے جوایم کیوایم کوصفحہ ہستی سے ختم کرنے کے درپے ہیں۔ جناب الطا ف حسین نے کہاکہ ایم کیوایم دشمن عناصر نے علی رضاعابدی کاقتل کرکے ایم کیوایم سے علیحدہ ہوجانے والوں کویہ پیغام دیاہے کہ جوبھی الطاف حسین کی حمایت میں بولے گا اس کایہی انجام ہوگا۔ جناب الطاف حسین نے کہاکہ میں علی رضاعابدی کے اہل خانہ کے غم میں برابرکاشریک ہوں اور دعاگوہوں کہ اللہ تعالیٰ علی رضاعابدی کی مغفرت فرمائے، انہیں جنت الفردوس میں جگہ دے اورتمام سوگوارلواحقین کوصبرجمیل عطاکرے۔ 

*****