ایم کیوایم رابطہ کمیٹی کا دوا ساز کمپنیوں کی جانب سے مختلف ادویات کی قیمتوں میں ہوش ربا اضافے پر اظہار تشویش

کراچی:۔۔11؍ فروری 2016ء 

متحدہ قومی موومنٹ کی رابطہ کمیٹی نے دواساز کمپنیوں کی جانب سے مختلف ادویات کی قیمتوں میں ہوش ربا اضافے پر گہری تشویش کا اظہار کیا ہے۔ اپنے ایک بیان میں رابطہ کمیٹی نے کہا کہ مہنگائی کے اس دور میں جب غریبوں کے لئے دو وقت کی روٹی کھانا ہی مشکل ہے ایسے میں دواؤں کی قیمتوں میں اضافہ ان کی جانوں سے کھیلنے کے مترادف ہے ۔ رابطہ کمیٹی نے کہا کہ سرکاری اسپتالوں میں ویسے ہی مریضوں کو علاج و معالجے کی مناسب سہولیتں اور ادویات میسر نہیں ہیں جس کی وجہ سے غریب عوام اپنی اور اپنے پیاروں کی جان بچانے کے لئے مہنگی دوائیں بازار سے خریدنے پر مجبور ہیں ۔ جبکہ دوسری جانب ملکی اور بین الاقوامی دواساز کمپنیوں نے اپنے منافع کے لئے مختلف ادویات کی قیمتوں میں بڑے پیمانے پر اضافہ کردیا جو کہ قابل مذمت ہے ۔ ایم کیو ایم رابطہ کمیٹی نے وزیراعظم پاکستان میاں محمد نوازشریف ، وزیراعلیٰ سندھ سید قائم علی شاہ ، اور صوبائی وزیر صحت سے مطالبہ کیا ہے کہ ملک بھر خصوصاً صوبہ سندھ میں جان بچانے والی اورعام استعمال کی ادویات میں ہونے والے اضافے کا فی الفور نوٹس لیتے ہوئے دواساز کمپنیوں کے مالکان کو ادویات کی قیمتوں میں کمی کرنے کی ہدایت کریں تاکہ تمام ادویات عوامی پہنچ میں رہیں ۔