حق پرست شہداء نے تحریکی جدوجہد میں اپنی قیمتی جانوں کے نذرانے پیش کرکے تحریک کو ہمیشہ جلا بخشی ہے ، الطاف حسین

لندن۔۔۔8، دسمبر2015ء 

متحدہ قومی موومنٹ کے قائد جناب الطاف حسین نے کہا ہے کہ ایم کیوایم کے حق پرست شہداء نے تحریکی جدوجہد میں اپنی قیمتی جانوں کے ہزاروں نذرانے پیش کرکے تحریک کو ہمیشہ جلا بخشی ہے اور جو تحریکیں یا قومیں اپنے شہداء کی قربانیوں کی قدر نہیں کرتی اور انہیں بھلا دیتی ہیں وہ وقت کے ساتھ ساتھ حالات کے جبر کا شکار ہوکر ختم ہوجایا کرتی ہیں ۔9دسمبر یوم شہداء کے موقع پر اپنے پیغام میں جناب الطاف حسین نے حق پرست شہداء کو زبردست خراج عقیدت پیش کرتے ہوئے کہاکہ ایم کیوایم کے معصوم اور بے گناہ کارکنان نے حق پرستانہ جدوجہد کی پاداش میں ظلم وستم ، جبر و استبداد کے ہتھکنڈوں کا ہمیشہ جواں مردی ، ہمت و جرات اور حوصلے کے ساتھ ہر دور میں سامنا کیا لیکن باطل قوتوں کے آگے اپنا سر نہیں جھکایا اور حق پرستی کی راہ میں اپنی جانیں تک قربان کردیں ۔انہوں نے کہاکہ ایم کیوایم کی حق پرستانہ جدوجہد کو تمام تر مظالم کے باوجود اسی لئے آج تک ختم نہیں کیاجاسکا کیونکہ اس کی آبیاری حق پرست شہداء اپنے خون سے کرتے آئے ہیں اور آج بلدیاتی انتخابات 2015ء میں ایم کیوایم کی میر پور خاص ، حیدرآباد اور کراچی سے شاندار کامیابیاں حق پرست شہداء کی قربانیوں کی ہی مرہون منت ہے۔ انہوں نے کہاکہ9دسمبر کے دن یہ عہد کیاجائے کہ ہم اپنے شہداء کی قربانیوں کو ہرگز فراموش نہیں کریں گے اور شہداء کے لواحقین کی خبر گیری سے کبھی بھی غافل نہیں ہوں گے ۔ جناب الطاف حسین نے حق پرست شہداء کے بلند درجات کیلئے اللہ تعالیٰ کے حضور خصوصی دعا کی اور کہا کہ حق پرست شہداء کی قربانیاں ضرور رنگ لائیں گی اور تحریکی جدوجہد ایک دن ضرور اپنے مشن ، مقصد اور نظریئے میں کامیاب ہوگی ۔ 
English