ایم کیوایم رابطہ کمیٹی کے رکن قمر منصور کی سرکاری حراست میں حالت انتہائی غیر ہے، حق پرست اراکین قومی اسمبلی

کراچی ۔۔۔26، جولائی 2015ء 

متحدہ قومی موومنٹ کے حق پرست اراکین قومی اسمبلی نے کہا ہے کہ سرکاری حراست میں ایم کیوایم کی رابطہ کمیٹی کے رکن قمر منصور کو غیر انسانی سلوک اور تشدد کا نشانہ بنانا اور انہیں اسپتال میں داخل نہ کرنا سراسر ظلم ہے ۔اپنے مشترکہ بیان میں انہوں نے کہاکہ ایم کیوایم کی رابطہ کمیٹی کے رکن قمر منصور کو 29ویں رمضان المبار ک کی شب کو غیر قانونی اور غیر آئینی طور پر گرفتار کرنے کے بعد 90روزکا ریمانڈ لیکر جھوٹے مقدمات میں ملوث کرنے کی سازش کی جارہی ہے اور ان پر جبر و تشدد کا سلسلہ جاری ہے جس کے باعث ان کی حالت غیر ہوچکی ہے ۔ انہوں نے کہاکہ قمر منصور کو اس سے قبل بھی 90ء کی دہائی میں گرفتاری کے دوران انسانیت سوز تشدد کا نشانہ بنایاجا چکا ہے جس کے بعد سے وہ اب تک مکمل طور پر صحت یاب نہیں ہوسکے ہیں ۔ انہوں نے کہاکہ قمر منصور کو قائد تحریک جناب الطاف حسین کی تقریر کے انتظامات کرنے اور تقریر پر تالیاں بجانے کی پاداش میں غیر قانونی اور غیر آئینی طریقے سے ہراساں کیاجارہا ہے۔ انہوں نے کہاکہ قمر منصور کی سرکاری حراست میں حالت انتہائی خراب ہے ، پیشی کے موقع پر بھی ان کا چہرہ دیکھ کر ہر کسی نے یہ اندازہ لگا لیا تھا کہ وہ انتہائی کرب میں ہیں اور سخت اذیت میں مبتلا ہونے کے باوجود قمر منصور کو طبی سہولیات فراہم نہ کرنا انصاف کے دوہرے معیار کو ثابت کرتا ہے ۔ حق پرست اراکین قومی اسمبلی نے وزیراعظم نواز شریف اور وزیراعلیٰ سندھ سید قائم علی شاہ سے مطالبہ کیا کہ ایم کیوایم رابطہ کمیٹی کے رکن قمر منصور کو فی الفور سرکاری حراست سے نکال کر طبی سہولیات فراہم کی جائیں اور انہیں جلدا ز جلد مقامی اسپتال میں داخل کرایاجائے ۔
English