کراچی میں اسٹریٹ کرائم کی بڑھتی ہوئی وارداتوںپررابطہ کمیٹی کااظہارتشویش

لندن۔۔۔21، فروری2022ئ

متحدہ قومی موومنٹ کی رابطہ کمیٹی نے کراچی میں اسٹریٹ کرائم کی بڑھتی ہوئی وارداتوں پر گہری تشویش کااظہارکرتے ہوئے کہاہے کہ رینجرز اورپولیس نے کراچی کے شہریوں کو غیرمقامی جرائم پیشہ عناصر کے رحم وکرم پر چھوڑ رکھا ہے ۔ ایم کیوایم انٹرنیشنل سیکریٹریٹ لندن سے جاری ہونے والے ایک بیان میں رابطہ کمیٹی نے کہاکہ کراچی میں رینجرز اورپولیس کی جگہ جگہ چوکیوں کے باوجود شہریوں کی جان ومال اورعزت وآبرو عدم تحفظ کا شکار ہے، جرائم پیشہ عناصرنہ صرف شہریوں کو ان کے گھرکے دروازے پر لوٹ رہے ہیں، انہیں موٹرسائیکل، موبائل فون ، نقدی اور دیگر قیمتی اشیاء سے محروم کررہے ہیں بلکہ لوٹ مار کی واردات کے دوران شہریوں کوفائرنگ کرکے قتل بھی کررہے ہیں۔رابطہ کمیٹی نے کہاکہ گزشتہ دنوں کورنگی میں باقاعدہ ایک گھنٹے تک ناکہ لگاکر100 سے زائدشہریوں کو لوٹا گیا لیکن رینجرز اورپولیس کو مطلع کرنے کے باوجود شہریوں کو تحفظ فراہم نہیں کیاگیا۔ رابطہ کمیٹی نے کہاکہ میڈیاکی رپورٹ کے مطابق گزشتہ دو ماہ کے دوران جرائم پیشہ عناصر درجنوں افراد کو فائرنگ کرکے قتل کرچکے ہیں ،سوشل میڈیا پرگردش کرنے والی وڈیوز میں ان جرائم پیشہ عناصر کے چہرے واضح دیکھے جاسکتے ہیں لیکن اس کے باوجود رینجرز اورپولیس کی جانب سے جرائم پیشہ عناصر کے خلاف کوئی مؤثر اورعملی کارکردگی دیکھنے میں نہیں آرہی ہے جبکہ کئی وارداتوں میں رینجرز اورپولیس اہلکاربراہ راست ملوث پائے گئے جس کی وجہ سے کراچی کے عوام یہ سوچنے پر مجبورہیں کہ اگر سندھ کے خزانے سے بھاری فنڈز حاصل کرنے کے باوجود رینجرز شہریوں کی جان ومال اورعزت وآبروکے تحفظ میں ناکام ہے توپھر کراچی میں رینجرز کی تعیناتی کاکیااخلاقی جواز باقی رہ جاتا ہے ؟ رابطہ کمیٹی نے کہاکہ کراچی کے شہریوں نے اپنی مدد آپ کے تحت اپنے اپنے علاقوں میں بیرئیرز اور حفاظتی گیٹ لگائے تھے جنہیں رینجرز نے ہٹادیا اور جرائم پیشہ عناصر کو لوٹ ماراور قتل وغارتگری کی کھلی چھوٹ دیدی ۔ رابطہ کمیٹی نے سندھ حکومت سے مطالبہ کیاکہ کراچی میں اسٹریٹ کرائمزکافوری نوٹس لیاجائے، جرائم پیشہ عناصر کی سرپرستی کرنے والے رینجرز اورپولیس افسران کوقانون کے کٹہرے میں لایاجائے اور شہریوں کو جان ومال کاتحفظ فراہم کیاجائے ۔ 

٭٭٭٭٭