حیدرآباد کے جوائنٹ زونل انچارج عامراقبال کے گھرپرسرکاری اہلکاروں کاچھاپہ

متحدہ قومی موومنٹ کی رابطہ کمیٹی نے ایم کیوایم حیدرآبادکے جوائنٹ زونل انچارج عامر اقبال خانزادہ کے گھرپر قانون نافذ کرنے والے ادارے کے اہلکاروں کے غیرقانونی چھاپے اورتوڑپھوڑکی شدیدمذمت کی ہے ۔ ایک بیان میں رابطہ کمیٹی نے کہاکہ قانون نافذکرنے والے اداروں نے ایم کیوایم حیدرآباد کے جوائنٹ زونل انچارج کے رکن عامراقبال خانزادہ کی گرفتاری کیلئے گرونگر میں واقع بلڈنگ میں ان کے فلیٹ پر چھاپہ مارا۔ عامراقبال خانزادہ اوران کے اہل خانہ ا س وقت گھر پر نہیں تھے اور فلیٹ پر تالا لگا ہوا تھا۔ رابطہ کمیٹی نے کہاکہ سرکاری اہلکار فلیٹ کا تالا توڑ کرزبردستی گھر میں داخل ہوئے اور پورے فلیٹ کی تلاشی لی ، تلاشی کے دوران فلیٹ میں توڑپھوڑ کی اورگھرمیں موجود لیپ ٹاپ، LED اور دیگر اشیاء اپنے ساتھ لے گئے ۔

رابطہ کمیٹی نے عامراقبال خانزادہ کے گھرپر غیرقانونی چھاپے کی شدید مذمت کرتے ہوئے کہاکہ کراچی اورحیدرآباد میں قائد تحریک جناب الطاف حسین کے وفادار کارکنان کے گھروں پر غیرقانونی چھاپے مارے جارہے ہیں، انہیں غیرقانونی طورپرگرفتارکرکے لاپتہ کیاجارہا ہے اورظلم کی انتہاء یہ ہے کہ ایم کیوایم کے جلاوطن اورروپوش رہنماؤں ، ذمہ داروں اورمتحرک کارکنان کے غیرسیاسی رشتہ داروں تک کو گرفتارکرکے لاپتہ کیاجارہا ہے جس کی جتنی بھی مذمت کی جائے کم ہے ۔ رابطہ کمیٹی نے کہاکہ مہاجروں کو دیوارسے لگانے والے عناصر ہوش کے ناخن لیں اور جان لیں کہ جبروستم کے ہتھکنڈوں سے نہ تو ایم کیوایم کے کارکنان کوخوف زدہ کیاجاسکتا ہے اورنہ ہی ایم کیوایم کو حق پرستی کی جدوجہدسے بازرکھاجاسکتا ہے ۔ رابطہ کمیٹی نے حکومت وانتظامیہ سے مطالبہ کیاکہ عامراقبال خانزادہ کے گھرپر غیرقانونی چھاپے کا نوٹس لیاجائے اور پرامن مہاجروں کو ہراساں کرنے کاسلسلہ بند کرایاجائے۔

*****