اسٹیبلشمنٹ اوروڈیروں جاگیرداروں کاگٹھ جوڑ ہے جوغریب ومتوسط طبقہ کی قیاد ت ملک میں آگے آنے نہیں دیتا۔مصطفےٰ عزیزآبادی

متحدہ قومی موومنٹ کی رابطہ کمیٹی کے رکن مصطفےٰ عزیزآبادی نے کہاہے کہ پاکستان میں اسٹیبلشمنٹ اوروڈیروں جاگیرداروں کاگٹھ جوڑ ہے جوغریب ومتوسط طبقہ کی قیاد ت ملک میں آگے آنے نہیں دیتا، قائدتحریک الطاف حسین کاقصوریہی ہے کہ انہوں نے فرسودہ جاگیردارانہ نظام کوچیلنج کیا، اسی لئے اسٹیبلشمنٹ ان کی دشمن بن گئی اوران پر ان کے وطن کی زمین تنگ کردی گئی۔ انہوں نے یہ بات ایم کیوایم یوکے برمنگھم یونٹ کے زیراہتمام دعوت افطارسے خطاب کرتے ہوئے کہی۔ افطارپارٹی میں ایم کیوایم کے کارکنوں اورپاکستانی کمیونٹی کے لوگوں نے شرکت کی ۔تقریب سے ایم کیوایم یوکے کے آرگنائزر ہاشم اعظم، جوائنٹ آرگنائزر سہیل زیدی،برمنگھم کے یونٹ انچارج محمداشرف اوردیگرارکان نے بھی خطاب کیا۔ مصطفےٰ عزیزآبادی نے کہاکہ پاکستان میں انقلاب اورتبدیلی کامحض نعرہ دیاجاتاہے یہ نعرے دینے والے انقلاب کے معنوں سے بھی واقف نہیں ہیں، تبدیلی کی باتیں کرنے والے بھی دراصل اسٹیبلشمنٹ کی پیداوارہیں۔انہوں نے کہاکہ قائدتحریک الطاف حسین کوپاکستان کی سرکاری ایجنسیوں نے خریدنے کی کئی بار کوشش کی لیکن قائدتحریک الطاف حسین نے اپناظرف وضمیرفروخت کرنے سے انکارکردیاجس کااعتراف آئی ایس آئی کے سابق افسربریگیڈیئرامتیاز بھی قوم کے سامنے کرچکے ہیں۔ اسی جرم کی پاداش میں بانی وقائدجناب الطاف حسین پرپاکستان کی زمین تنگ کردی گئی اور19جون 1992ء میں ایم کیوایم کے خلاف بدترین فوجی آپریشن شروع کیاگیاجو آج تک جاری ہے۔انہوں نے کہاکہ پاکستان میں آج صرف انہی کوسیاست کرنے کی اجازت ہے جواسٹیبلشمنٹ کی پیداوارہیں یااسٹیبلشمنٹ کے سامنے سرجھکانے کیلئے اوراس کی ہاں میں ہاں ملانے کیلئے تیارہوں ، جواسٹیبلشمنٹ کے غلط اقدامات کوغلط اورظلم کوظلم کہتے ہوں ان کوغدار، ملک دشمن قراردے کرریاستی طاقت سے کچلنے کی پالیسی پر عمل کیاجارہاہے اوربعض متعصب تجزیہ نگار چندٹکوں کے عوض اپنے آپ کوبیچ کراسٹیبلشمنٹ کے ظلم کی حمایت کررہے ہیں۔ ایم کیوایم یوکے کے آرگنائزر ہاشم اعظم نے کہاکہ طاقت کے ذریعے ایم کیوایم کوکچلنے کی کوشش کی جارہی ہے لیکن ہمارا بھی یہ عزم ہے کہ ہم تمام ترمظالم ، سازشوں اورپروپیگنڈوں کے باوجود قائدتحریک الطاف حسین کی قیادت میں اپنی جدوجہد جاری رکھیں گے۔