ایم کیوایم کے رکن قومی اسمبلی عبد الوسیم اور سینیٹر و صوبائی صدر پنجاب میاں عتیق کا چارسدہ ڈسٹرک اسپتال کا دورہ

چارسدہ۔۔۔21، جنوری 2016ء 

متحدہ قومی موومنٹ کے رکن قومی اسمبلی عبد الوسیم اور سینیٹر و صوبائی صدر پنجاب میاں عتیق نے آج چارسدہ ڈسٹرک اسپتال کا دورہ کیا اور سانحہ باچا خان یونیورسٹی میں زخمی ہونے والے افراد کی عیادت کی اور قائد تحریک جناب الطاف حسین کی جانب سے زخمیوں کی خیریت دریافت کی ۔انہوں نے اسپتال میں زخمیوں کی فرداً فرداً عیادت کی اور ان کی جلد ومکمل صحت یابی کیلئے اللہ تعالیٰ کے حضور خصوصی دعا بھی کی ۔ بعدازاں عبد الوسیم اور میاں عتیق نے سانحہ باچا خان یونیورسٹی میں شہید ہونے والے افراد کے گھروں کا دورہ کیا اور سوگوار لواحقین سے قائد تحریک جناب الطاف حسین کی جانب سے دلی تعزیت وہمدردی کااظہار کیا اور انہیں جناب الطاف حسین کا پیغام دیا ۔انہوں نے شہداء کے لواحقین سے گفتگو کرتے ہوئے کہاکہ دہشت گردوں نے باچا خان یونیورسٹی پر حملہ کرکے جس طرح سے معصوم اساتذہ ، پروفیسر ، طالب علموں اور سیکورٹی اہلکاروں کا خون بہایا ہے وہ ضائع نہیں جائے گا اور انشاء اللہ اس میں ملوث سفاک دہشت گردوں کے ایک ایک سرپرست ، حمایتی اور معاون و مددگار بھی نشان عبرت بن جائیں گے ۔ انہوں نے شہداء کے لواحقین کو دلاسہ دیتے ہوئے کہا کہ ایم کیوایم سانحہ چارسدہ کے شہداء کے غم میں برابر کی شریک ہے اور آج ایم کیوایم کے مرکز نائن زیرو پر شہداء کی یاد میں شمعیں روشن کرنے کی تقریب بھی منعقد کی جائے گی ۔ انہوں نے شہداء کے لواحقین کو صبر کی تلقین کی اور دعا کی کہ اللہ تعالیٰ شہداء کو جنت الفردوس میں اعلیٰ مقام عطا فرمائے اور سوگواران کو یہ صدمہ برداشت کرنے کا حوصلہ عطاکرے ۔