متحدہ قومی موومنٹ نے شہر کراچی کے میئر کو اختیارات واپس دلانے کیلئے آئینی اور قانونی جدوجہد کا آغاز کردیا
پہلے مرحلے میں ایم کیوایم کے ارکان سندھ اسمبلی نے کراچی واٹر اینڈ سیوریج بورڈ کے موجودہ ایکٹ میں میئر کراچی کے اختیارات کو بحال کرنے کیلئے ترمیمی بل سندھ اسمبلی میں جمع کرادیا
ترمیمی بل میں کہا گیا ہے کہ کراچی میٹرو پولیٹن کارپوریشن کا میئر بورڈ کا چیئرمین ہوگا جبکہ وائس چیئرمین کی نامزدگی کا اختیار اسپیکر سندھ اسمبلی کو حاصل ہوگا
ترمیمی بل میں حکومت سندھ کو حاصل واٹر بورڈ کے چیئرمین اور وائس چیئرمین مقرر کرنے کے اختیارات کی شق کا خاتمہ کرنے کی سفارش بھی کی گئی ہے
کراچی ۔۔۔30، دسمبر2015ء
متحدہ قومی موومنٹ نے شہر کراچی کے میئر کو اختیارات واپس دلانے کیلئے آئینی اور قانونی جدوجہد کا آغاز کردیا ہے ۔ اس سلسلے کے پہلے مرحلے میں بدھ کے روز سندھ اسمبلی میں ایم کیوایم کے اراکین سندھ اسمبلی سید خالد احمد ، سید انور رضا اور جمال احمد نے کراچی واٹر اینڈ سیوریج بورڈ کے موجودہ ایکٹ میں میئر کراچی کے اختیارات بحال کرنے کیلئے ترمیمی بل جمع کرادیا ہے ۔ ترمیمی بل میں کہا گیا ہے کہ کراچی میٹرو پولیٹن کارپوریشن کا میئر بورڈ کا چیئرمین ہوگا جبکہ وائس چیئرمین کی نامزدگی کا اختیار اسپیکر سندھ اسمبلی کو حاصل ہوگا جس کے تحت وہ کراچی سے منتخب ہونے والے کسی بھی رکن سندھ اسمبلی کو اس عہدے کیلئے منتخب کرسکتے ہیں ۔ ترمیمی بل میں حکومت سندھ کو حاصل واٹر بورڈ کے چیئرمین اور وائس چیئرمین مقرر کرنے کی اختیارات کی شق کا خاتمہ کرنے کی سفارش بھی کی گئی ہے ۔
English Viewers