جبری گمشدگی کے بارے میں اقوام متحدہ کی ہیومن رائٹس کونسل کے ورکنگ گروپ کا ایم کیوایم کے لاپتہ رہنماؤں نثارپہنور اور انورخان ترین کی جبری گمشدگی پر اظہار تشویش۔
ورکنگ گروپ نے ارجنٹ ایکشن پروسیجر کے تحت کیس کو حکومت پاکستان کوبھیجا ہے۔
ورکنگ گروپ کاایم کیوایم کے انٹرنیشنل ریلیشنزاینڈہیومن رائٹس ونگ کے نام خط۔
ورکنگ گروپ کا ایم کیوایم کے انٹرنیشنل ریلیشنزاینڈ ہیومن رائٹس ونگ کو26 سے 30جنوری 2026ء تک ہونے والے ورکنگ گروپ کے 138ویں سیشن میں شرکت اور ماہرین سے ملاقات کی دعوت۔
لندن …28 نومبر 2025
جبری گمشدگی کے بارے میں اقوام متحدہ کی ہیومن رائٹس کونسل کے ورکنگ گروپ نے ایم کیوایم کے لاپتہ رہنماؤں نثارپہنور اور انور خان ترین کی جبری گمشدگی پراپنی تشویش کااظہار کیا ہے۔ایم کیوایم کے انٹرنیشنل ریلیشنز اینڈہیومن رائٹس ونگ کو موصول ہونے والے اپنے خط میں اقوام متحدہ کی ہیومن رائٹس کونسل کے ورکنگ گروپ کی جانب سے کہا گیا کہ ورکنگ گروپ نے نثار پہنوراور انورخان ترین کی جبری گمشدگی کے کیس پر غورکیا ہے اور اپنے ارجنٹ ایکشن پروسیجر کے تحت اس کیس کوحکومت پاکستان کوبھیجا گیا ہے اورورکنگ گروپ نے اس امید کا اظہارکیا ہےکہ نثار پہنور اورانور ترین کےحقوق کے تحفظ کے لئے ان کی بازیابی اوران کےمقام کے بارے میں معلومات کے لئے اس کیس کی مناسب تحقیقات کی جائیں گی اوراس کیس کے سلسلے میں حکومت پاکستان کی جانب سے جوبھی معلومات حاصل ہوں گی وہ آپ کوبھیجی جائیں گی۔
اقوام متحدہ کے ورکنگ گروپ نے ایم کیوایم کے انٹرنیشنل ریلیشنز اینڈہیومن رائٹس ونگ کے نام اپنے خط میں کہاہے کہ اس کیس کے سلسلے میں مزید تفصیلات یا جو مزید اطلاعات ہوں تووہ بھی بھیج دیں تاکہ 26 سے 30جنوری 2026ء تک ہونے والے ورکنگ گروپ کے 138 ویں سیشن میں اس پر غور کیاجائے۔
اقوام متحدہ ہیومن رائٹس کونسل کے ورکنگ گروپ نے ایم کیوایم کے انٹرنیشنل ریلیشنزاینڈہیومن رائٹس ونگ کوانسانی حقوق کے بارے میں جنیوا میں ہونے والے اپنے آئندہ سیشن میں شرکت اورورکنگ گروپ کے ماہرین سے ملاقات کی بھی دعوت دی ہے۔
واضح رہے کہ ایم کیوایم کے انٹرنیشنل ریلیشنزاینڈہیومن رائٹس ونگ کی جانب سے اقوام متحدہ کے ہیومن رائٹس کونسل کے ورکنگ گروپ برائے جبری گمشدگی کو نثار پہنور اور انورخان ترین کی جبری گمشدگی کے بارے میں پٹیشنز بھیجی گئی تھیں۔