ایم کیوایم ساؤتھ افریقہ کے آرگنائزر محمدیوسف کے بہیمانہ قتل کے سانحے پر تین روزتک سوگ منایاجائے گا، ایم کیوایم رابطہ کمیٹی کے اجلاس میں فیصلہ

لندن …  23  اکتوبر 2023ئ

متحدہ قومی موومنٹ کی رابطہ کمیٹی نے ایم کیوایم ساؤتھ افریقہ کے سینٹرل آرگنائزر محمدیوسف کے بہیمانہ قتل کی شدید مذمت کرتے ہوئے کہاہے کہ محمدیوسف کابہیمانہ قتل ایک بڑاسانحہ ہے اوراس سانحے پر ایم کیوایم کی جانب سے تین روزتک سوگ منایاجائے گا۔اس بات کافیصلہ رابطہ کمیٹی کے اجلاس میں کیاگیا۔ بانی وقائدتحریک جناب الطاف حسین نے رابطہ کمیٹی کے اس فیصلے کی توثیق کردی۔ اجلاس میں محمدیوسف شہید کو زبردست خراج عقیدت پیش کیاگیا۔ اجلاس کے بعد اپنے بیان میں رابطہ کمیٹی نے کہا کہ محمدیوسف کو ساؤتھ افریقہ کے شہر ڈربن میں ان کی دکان پر نامعلوم افراد نے اس وقت گولیاں مارکرشہید کیاجب وہ معمول کے مطابق صبح کے وقت اپنی دکان کھولنے کے بعد قرآن مجید کی تلاوت کررہے تھے۔ رابطہ کمیٹی نے کہاکہ محمدیوسف کی شہادت ایم کیوایم کیلئے ایک بہت بڑااورناقابل تلافی نقصان ہے ، یہ ایسا سانحہ ہے جس پرنہ صرف ساؤتھ افریقہ بلکہ پاکستان سمیت دنیا بھرمیں جہاں جہاں ایم کیوایم کے کارکنان موجود ہیں وہ شدیددلی صدمے ا وررنج والم میں مبتلا ہیں ۔ رابطہ کمیٹی نے پاکستان سمیت دنیابھرمیں موجود ایم کیوایم کے کارکنوںسے اپیل کی کہ وہ محمدیوسف شہید کی شہادت پر تین روز ہ سوگ کے سلسلے میں شہید کے ایصال ثواب کیلئے قرآن خوانی وفاتحہ خوانی کریں،بازؤوںپرسیاہ پٹیاں باندھیں، شہید کو خراج عقیدت پیش کریںاورجہاں جہاں جتنے بھی قرآن مجید یا سورتیں پڑھیں اس کی تفصیل سے انٹرنیشنل سیکریٹریٹ لندن کو ضرورآگاہ کردیں تاکہ انہیں بخشاجائے اور محمدیوسف شہید کو ایصال ثواب پہنچایا جائے ۔ دریں اثناء اس سانحہ پر ایم کیوایم کی رابطہ کمیٹی کل بروز منگل لندن وقت شام 4بجے ایک وڈیوبریفنگ بھی کریگی جوسوشل میڈیاپر براہ راست نشر کی جائے گی۔