حکومت سندھ کی جانب سے مالی وسائل کوجوازبناکرفرئیرہال اورفیضی گیلری کو محکمہ ثقافت سندھ کے حوالے کرنے کی تیاریوں پر نامزدمیئروسیم اخترکی مذمت
سندھ حکومت بلدیہ اعظمیٰ کراچی کے قیمتی اثاثوں اوراداروں پرقبضہ کرکے اپنی کالونی بناناچاہتی ہے ،نامزحق پرست میئر
سندھ حکومت کی جانب سے فریئرہال اورفیضی گیلری پرقبضے کامنصوبے کانوٹس لیاجائے اورکراچی کے ساتھ سوتیلی ماں کاسلوک بندکروایاجائے،وسیم اختر
کراچی: ۔۔۔25، فروری 2016ء
متحدہ قومی موومنٹ کی جانب سے نامزدحق پرست میئرکراچی وسیم اختر نے حکومت سندھ کی جانب سے مالی وسائل کوجوازبناکرفرئیرہال اورفیضی گیلری کوکراچی سے چھین کر محکمہ ثقافت سندھ کے حوالے کرنے کی شدید الفاظ میں مذمت کی ہے اوراسے کراچی اوراس کے عوام کے ساتھ کھلی زیادتی قراردیتے ہوئے کہاکہ سندھ حکومت بلدیہ اعظمیٰ کراچی کواپنی کالونی بناناچاہتی ہے۔ایک بیان میں وسیم اخترنے کہاکہ کراچی کے عوام نے حالیہ بلدیاتی انتخابات میں نامزدحق پرست نمائندوں کوبھاری اکثریت سے کامیاب بنایاجبکہ پیپلزپارٹی کو بدترین شکست سے دوچارکیایہی وجہ ہے کہ بلدیاتی انتخابات کے بعدپیپلزپارٹی کی سندھ حکومت کارویہ کراچی اور اس کے عوام کے ساتھ سوتیلی ماں جیسا ہوگیاہے اورسندھ حکومت کی جانب سے کراچی اوراس کے عوام کوانتقام کانشانہ بنانے کاعمل بڑھتاجارہاہے۔انہوں نے کہاکہ فریئرہال اورفیضی گیلری میں ثقافتی سرگرمیوں کی نگرانی بلدیہ اعظمیٰ کررہی ہے تاہم سندھ حکومت فنڈزکوجوازبناکران اداروں کوبلدیہ اعظمیٰ سے ہتھیانے کے منصوبے بنارہی ہے ۔انہوں نے کہاکہ کراچی قومی خزانے میں70فیصدسے زائدریونیوجمع کراتاہے اس شہرکوفنڈزسے محروم رکھنااوراس کے اثاثوں اوراداروں پرقبضہ کرناکھلی کراچی دشمنی ہے۔انہوں نے کہاکہ اس سے قبل بھی سندھ حکومت نے بلدیہ اعظمیٰ کراچی سے بلڈنگ کنٹرول اتھارٹی ،لوکل ٹیکسز،سولڈ ویسٹ مینجمنٹ اورڈسٹرکٹ ہیلتھ مینجمنٹ جیسے اہم محکمے زبردستی چھین کراپنے قبضے میں لے چکی ہے اور اب میئراورڈپٹی میئرکے حلف اٹھانے سے قبل کراچی کے دواہم تاریخی اورثقافتی اثاثوں پر نظریں گاڑھے بیٹھی ہے۔وسیم اخترنے کہاکہ ایک جانب سندھ حکومت بلدیہ اعظمیٰ کراچی کے فنڈزروکے بیٹھی ہے جس کے باعث کراچی میں ترقیاتی کام تعطل کاشکارہیں اوربلدیاتی ملازمین تنخواہوں سے محروم ہیں جبکہ دوسری جانب فنڈزکی کمی کوجوازبناکرسندھ حکومت بلدیہ اعظمیٰ کے قیمتی اثاثہ جات پر قبضہ کررہی ہے جوسراسرکراچی دشمنی ہے اورجس کی جتنی بھی مذمت کی جائے کم ہے۔انہوں نے کہاکہ ہوناتویہ چاہئے تھاکہ سندھ حکومت بلدیہ اعظمیٰ کے اداروں کواپنی تحویل میں لینے کے بجائے اس کے اختیارات اورفندزمیں اضافہ کرتی تاکہ کراچی اوراس کے عوام کی بہترطریقے سے کام کرسکے۔نامزدحق پرست میئرکراچی وسیم اخترنے مطالبہ کیاکہ سندھ حکومت کی جانب سے فریئرہال اورفیضی گیلری پرقبضے کامنصوبے کانوٹس لیاجائے اورکراچی کے ساتھ سوتیلی ماں کاسلوک بندکروایاجائے۔