ضمنی الیکشن میں شاندار کامیابی پرتین روزہ جشن منایاجائے، الطاف حسین

لندن۔۔۔23، اپریل2015ء

متحدہ قومی موومنٹ کے قائد جناب الطاف حسین نے کہاہے کہ قومی اسمبلی کے حلقہ این اے 246 کے ضمنی انتخاب میں ایم کیوایم کے نامز د امیدوار کنورنوید جمیل کی شاندار کامیابی پر تین روزہ جشن فتح منایا جائے اور شکرانے کے نوافل ادا کیے جائیں ۔ یہ بات انہوں نے جناح گراؤنڈ میں کارکنان وعوام کے بہت بڑے اجتماع سے ٹیلی فون پر خطاب کرتے ہوئے کہی ۔انہوں نے کہاکہ عوام نے بہت دکھ سہہ لیے اور ضمنی الیکشن کے سلسلے میں عوام نے بہت محنت کی ہے لہٰذا میں آج اعلان کرتا ہوں کہ ضمنی الیکشن میں ایم کیوایم کی شاندار کامیابی تین روز تک پرامن طریقے سے شاندارجشن فتح منایا جائے ۔اس دوران شکرانے کے نوافل بھی ادا کیے جائیں اورگھی کے چراغ جلائیں۔جناب الطاف حسین نے کارکنان وہمدرد عوام سے کہاکہ شاندار کامیابی پر جشن فتح منانا آپ کا حق ہے ، آپ خوب خوشیاں منائیں مگرسیاسی مخالفین کااحترام کریں،ان کے جھنڈوں اورپوسٹرزکونقصان نہ پہنچائیں۔خدار ااپنی کامیابی پر غروروتکبرکاشکار مت ہونا اور ہمیشہ انکساری سے کام لینا کیونکہ غروروتکبر اللہ تعالیٰ کو ہرگز پسند نہیں ہے ۔ جناب الطاف حسین نے ایم کیوایم کے نامزد امیدوار کی حمایت پر لیاقت آباد اور فیڈرل بی ایریا کے اہل تشیع، بریلوی، دیوبندی، الحدیث اور دیگر مکاتب فکرعلمائے کرام اورعوام سے دلی تشکرکااظہار کیا۔ انہوں نے حق پرست امیدوار کی حمایت پر عیسائی، ہندو، سکھ، پارسی ،احمدی اور دیگر مذاہب کے ماننے والے پاکستانیوں سے کا بھی شکریہ ادا کیا۔