جناب الطاف حسین نے سندھ کی تقسیم نہیں بلکہ بڑھتی ہوئی آبادی کو مد نظر رکھتے ہوئے انتظام کی بہتری کے لئے ملک بھرمیں نئے صوبوں کا مطالبہ کیا ہے، حق پرست ڈپٹی پارلیمانی لیڈرخواجہ اظہار الحسن

کراچی ۔۔۔17ستمبر 2014ء

سندھ اسمبلی میں متحد ہ قومی موومنٹ کے ڈپٹی پارلیمانی لیڈر خواجہ اظہار الحسن نے پیپلز پارٹی کے رہنما شر جیل انعام میمن کے حالیہ بیان پر تبصرہ کرتے ہوئے کہا کہ قائد تحریک الطاف حسین نے صوبہ سندھ کی تقسیم کی بات نہیں کی ہے بلکہ سندھ سمیت ملک بھر میں بڑھتی ہوئی آبادی اور دنیا کے ترقی یافتہ ممالک میں اصل جمہوری نظام کا مطالعہ کر کے پاکستان میں بھی انتظامی امور کی بہتری کے لئے نئے انتظامی یونٹس یا نئے صوبوں کے قیام کا مطالبہ کیا ہے۔ خوجہ اظہار الحسن نے کہا کہ سندھ کے شہری علاقوں میں بسنے والے نئے سندھی عوام بھی سندھ دھرتی کی عزت اور احترام کرتے ہیں اور اسی لئے گزشتہ 67برسوں سے سندھ کی ترقی میں اپنا کردار ادا کر رہے ہیں لیکن پیپلز پارٹی کے رہنما ؤں کی جانب سے جناب الطاف حسین کی تجویز پر منفی رد عمل نے سندھ کے محب وطن عوام کے جذبات کو مجروح کیاہے ۔انہوں نے کہا کہ ہونا تو یہ چاہئے تھا کہ پیپلز پارٹی نے جس طرح اپنے گزشتہ دور حکومت میں جنوبی پنجاب اور سرائیکی صوبے کی قرار داد قومی اسمبلی میں پیش کی تھی بلکل اسی طرح وہ سندھی عوام کی محرومیوں کا احساس کر کے جناب الطاف حسین کی تجاویز کی حمایت کرتے لیکن اس کے برعکس انہوں نے بھی نام نہاد قوم پرستوں کی طرح ضد اور انا کا دامن تھام کر بلواسطہ یا بلا واسطہ طور پر منفی بیانات کے ذریعے سندھ کے شہری و دیہی علاقوں کے عوام میں مزید تفریق پیدا کرنے کا سلسلہ شروع کر دیا ہے۔خواجہ اظہا ر الحسن نے شرجیل انعام میمن سے کہا ہے کہ وہ ایم کیو ایم کے قائد الطاف حسین کی تجاویز کو تعصب اور قوم پرستی کی عینک اُتار کر حقیقی پیراہے میں دیکھیں اور تحمل کا مظاہرہ کرتے ہوئے ملک کے وسیع مفاد میں فیصلوں کی اہمیت کو سمجھیں ۔