رمضان المبارک کے دوران شہرکے مختلف علاقوں میں پانی کی بندش پرحق پرست نمائندوں کااظہار تشویش

کراچی ۔۔۔22جولائی2014ء

حق پرست اراکین سندھ اسمبلی نے رمضان المبارک کے دوران شہرکے مختلف علاقوں میں پانی کی بندش پرگہری تشویش کااظہارکیاہے۔ ایک مشترکہ بیان میں حق پرست اراکین سندھ اسمبلی نے کہاکہ شہر کے مختلف علاقوں میں پانی کی سپلائی گزشتہ کئی روزسے بندہے جس کے باعث شہریوں کوشدیدمشکلات وپریشانیوں کاسامناکرناپڑرہاہے جبکہ پانی کی عدم فراہمی سے ان کے معمولات زندگی بھی شدید متاثر ہیں اورشہری دوران روزہ وضواورغسل کرنے سے بھی قاصرہیں ۔انہوں نے کہاکہ ایک جانب شہرمیں پانی کابحران ہے اورماہ رمضان کے دوران روزے دارشہری پانی کی بوندبوندکوترس رہے ہیں جبکہ دوسری جانب واٹربورڈکے افسران کی ملی بھگت سے بندکیے گئے غیرقانونی ہائیڈرینٹس سے بھاری قیمت پرپانی کی فراہمی جاری ہے جوغریب شہریوں کے ساتھ زیادتی ہے ۔ انہوں نے کہاکہ کراچی میں پانی کے بحران کے باوجودہائیڈریٹس سے پانی کی سپلائی لمحہ فکریہ اورحیران کن ہے جس سے واضح ہوگیاہے کہ سوچے سمجھے منصوبے کے تحت کراچی کے شہریوں کوپانی سے محروم رکھا جارہا ہے ۔حق پرست اراکین سندھ اسمبلی نے گورنر سندھ ڈاکٹرعشرت العباداوروزیراعلیٰ سندھ سیدقائم علی شاہ سے مطالبہ کیاکہ نارتھ کراچی،نارتھ ناظم آباد ،ناظم آباد،گلبہار، فیڈرل بی ایریا،لیاقت آباد ،سائیٹ ٹاؤن،بلدیہ ٹاؤن ، اورنگی ٹاؤن خاموش کالونی،پاک کالونی ،سرجانی ،لانڈھی کورنگی،ملیراورلائنزایریاسمیت کراچی میں مختلف علاقوں میں پانی کی بندش کانوٹس لیاجائے اوررمضان المبارک میں شہریوں پریشان کرنے سے بازرہاجائے۔