رینجرز کی جانب سے ایم کیوایم کے کارکنان کی بلاجواز گرفتاری اور چھاپوں کا سلسلہ پھر شروع کر دیا گیا ہے

ایم کیوایم کے گرفتار کارکنان کی زندگی کو تحفظ فراہم کیا جائے

کراچی۔۔۔۔12جولائی 2014ء

متحدہ قومی موومنٹ کی رابطہ کمیٹی نے کہا ہے کہ رینجرز کی جانب سے ایم کیوایم کے کارکنان کی بلاجواز گرفتاری اور چھاپوں کا سلسلہ دوبارہ شروع کردیا گیا ہے اور ایم کیوایم کے مزید8 کارکنان کی بلاجواز گرفتار ی اور چھاپوں کی مذمت کی ہے ۔ ایک بیان میں رابطہ کمیٹی نے کہاکہ ایم کیوایم لیاری سیکٹریونٹ 32کے کارکن عامر اختر دھنہ چال کمپاؤنڈ پلانٹ نمبر5-A میں واقع ان کے گھر سے گرفتار ہوئے، لیاری سیکٹر یونٹ 32کے کارکن شعیب زرینہ اسکوائر میں واقع انکے گھر سے گرفتاری عمل میں آئی،لیاری سیکٹریونٹ 31کے کارکن کاشف کو ان گھر سے گرفتار کیا گیا، رنچھوڑلائن کے کارکن شاہنواز سعید کو حق نگر کمپاؤنڈ میں واقع ان کے گھر سے گرفتارکیا گیا، بلدیہ سیکٹر یونٹ117کے کارکن شہزاد ولد شریف کو انکے رہائش گا ہ کے قریب واقع فیکٹری سے گرفتار کیا گیا ہے جبکہ لیاری سیکٹریونٹ 33کے کارکن قیوم کے گھر پر چھاپہ مارا اور انکے بھتیجے راشد کو بہیمانہ تشدد کا نشانا بنایا گیا،لیاری سیکٹریونٹ33کے فنانس سیکریٹری خورشید عالم کے گھر پر چھاپہ مارا انکے گھر والوں کو ہراساں کیا گیا اور لیار ی سیکٹریونٹ 33کے سرکل انچارج سلطان کی گاڑی سے فطرے کی بکس اپنے ساتھ لے گئے ۔رابطہ کمیٹی نے کورکمانڈر کراچی لیفٹیننٹ جنرل سجاد غنی سے مطالبہ کیا ہے کہ ایم کیوایم کے گرفتار کارکنان کی زندگی کو تحفظ فراہم کیا جائے ۔