ایم کیوایم کا 30واں یوم تاسیس منگل کو پاکستان سمیت دنیا بھر میں روایتی جوش و خروش سے منایاجائے گا

کراچی ۔۔۔17، مارچ2014ء 

ایم کیوایم کا 30واں یوم تاسیس 18مارچ 2014ء بروز منگل پاکستان سمیت دنیا بھر میں روایتی جوش و خروش سے منایا جائے گا ۔ یوم تاسیس کے موقع پر ملک بھر اور دنیا کے بیشتر ممالک میں اجتماعات منعقد ہوں گے جبکہ اس سلسلے کا مرکزی اجتماع جناح گراؤنڈ عزیز آباد میں ہوگا ۔یوم تاسیس کے اجتماعات سے متحدہ قومی موومنٹ کے بانی و قائد جناب الطاف حسین لندن سے ٹیلی فونک خطاب کریں گے ۔ایم کیوایم کے 30ویں یوم تاسیس کے سلسلے میں پاکستان سمیت دنیا بھر میں ایم کیوایم کے کارکنان و حق پرست عوام میں زبردست جوش و خروش پایاجارہا ہے جبکہ خواتین کا جوش و خروش بھی قابل دید ہے ، ایم کیوایم کے مختلف سیکٹروں ، ونگز اور شعبہ جات کی جانب سے کراچی شہر کی مین شاہراہوں پر یوم تاسیس کے بینرز لگادیئے گئے ہیں جن پر یوم تاسیس کی مبارکباد، تحریکی و انقلابی اشعار جلی حروف میں تحریر ہیں ۔ یوم تاسیس کے مرکزی اجتماع کے لئے جناح گراؤنڈ عزیز آباد میں تیاریوں کو حتمی شکل دیدی گئی ہے اور جناح گراؤنڈ ، اس کے اطراف کے علاقوں کو قائد تحریک جناب الطاف حسین کی تصاویر پر مشتمل پینا فلکس اسکرینوں ، ایم کیوایم کے پرچموں ، برقی قمقموں اور جھالروں سے سجا دیا گیا ہے جبکہ یوم تاسیس کے سلسلے میں ایم کیوایم کے مرکز نائن زیرو کو بھی مختلف اقسام کے پھولوں کی مدد سے دلہن کی طرح سجایا گیا ہے جو کارکنان و عوام کی خصوصی توجہ کا مرکز بنا ہوا ہے ۔ ایم کیوایم کے مرکز نائن زیرو ، ایم پی اے ہاسٹل ، خورشید بیگم سیکریٹریٹ اور اطراف کی گلیوں میں برقی قمقموں سے کی گئی سجاوٹ کے باعث تمام علاقہ بقعہ نور بنا ہوا ہے ۔