ٹارگٹڈآپریشن کے باوجود کراچی میں دہشت گردی اور قتل وغارتگری کا سلسلہ جاری ہے، الطاف حسین

لندن ۔۔،18، فروری 2014ء

متحدہ قومی موومنٹ کے قائد جناب الطاف حسین نے گلشن اقبال کے علاقے نیپاچورنگی پر واقع آئسکریم کی دکان پر مسلح دہشت گردوں کی فائرنگ کی شدید الفاظ میں مذمت کی ہے اور فائرنگ کے نتیجے میں2 افراد کے جاں بحق اورایک خاتون زخمی ہونے پر گہرے دکھ اور افسوس کااظہارکیا ہے ۔ ایک بیان میں جناب الطاف حسین نے کہاکہ جرائم پیشہ عناصر کے خلاف جاری ٹارگٹڈآپریشن کے باوجود کراچی میں دہشت گردی اور قتل وغارتگری کا سلسلہ جاری ہے اور ایسا محسوس ہوتاہے کہ کراچی میں سفاک قاتلوں اور دہشت گردوں کو کھلی چھوٹ دیدی گئی ہے ۔ جناب الطا ف حسین نے حکومت سے مطالبہ کیاکہ کراچی میں دہشت گردی اور قتل وغارتگری کے واقعات کا نوٹس لیا جائے ، بے گناہ شہریوں کی جان ومال سے کھیلنے والے دہشت گردوں کو گرفتارکرکے سخت ترین سز ادی جائے اورشہریوں کی جان ومال کے تحفظ کیلئے ٹھوس اقدامات کیے جائیں ۔ جناب الطاف حسین نے فائرنگ سے جاں بحق ہونے والے سیف اللہ اور قریش کے سوگوارلواحقین سے دلی تعزیت کااظہار کیا اورزخمی خاتون حنا صمدکی جلد صحت یابی کیلئے دعا بھی کی ۔