ایم کیوایم کے سینئررہنما ڈاکٹر فاروق ستار اور اپوزیشن لیڈر خواجہ اظہار الحسن کی گرفتاری قابل مذمت ہے۔ ندیم نصرت

لندن ۔۔۔ 22 اگست 2016ء

متحدہ قومی موومنٹ کی رابطہ کمیٹی کے کنوینرندیم نصرت نے ایم کیوایم کے سینئررہنما،رابطہ کمیٹی کے سینئرڈپٹی کنوینراورقومی اسمبلی میں پارلیمانی لیڈر ڈاکٹر فاروق ستار، سندھ اسمبلی میں اپوزیشن لیڈرخواجہ اظہارالحسن کی گرفتاری کی شدیدمذمت کی ہے ۔اپنے ایک بیان میں ندیم نصرت نے کہاکہ ایم کیوایم کے خلاف جاری آپریشن کے دوران ایم کیوایم کے 62کارکنوں کوماورائے عدالت قتل کردیاگیاجبکہ سوسے زائدکارکنان لاپتہ ہیں جبکہ گھرگھر گرفتاریاں اور چھاپے جاری ہیں ۔ ایم کیوایم کے کارکنان نے ان مظالم کے خلاف کراچی پریس کلب پر پرامن بھوک ہڑتال شروع کی تھی لیکن چھ روز گزرجانے کے باوجود حکمرانوں نے اس پر کوئی توجہ نہیں دی بلکہ آج ایک ٹی وی چینل کے دفترکے باہر بعض لوگوں کے احتجاج کے واقعہ کوجوازبناکرایم کیوایم کے رہنماؤں کی گرفتاریاں شروع کردی گئی ہیں۔ پریس کلب کے قریب پولیس کی فائرنگ سے ایم کیوایم لیاقت آبادٹاؤن یوسی 39 کے جوائنٹ انچارج عارف حسین شہید ہوگئے ۔اسی طرح ایک اورنوجوان بھی پولیس کی فائرنگ سے شدیدزخمی ہوگئے ۔ اس کے ساتھ ساتھ پولیس نے کئی بے گناہ کارکنوں کوگرفتار کرلیاگیا۔ ڈاکٹر فاروق ستار اور خواجہ اظہارالحسن آج شب جب اس بارے میں پریس کانفرنس کرنے پریس کلب پہنچے تورینجرزنے انہیں حراست میں لے لیا۔اسی طرح رینجرز کے حکام کی جانب سے ایم کیوایم کے رہنماؤں کنورنوید، عامرخان، قمرمنصوراورشاہدپاشاکوبھی رینجرزدفتربلوایاگیا تھا لیکن رات گئے ان کے بارے میں بھی کوئی اطلاع نہیں ہے جس سے خدشہ ہے کہ ان رہنماؤں کوبھی حراست میں لے لیاگیاہے۔ ندیم نصرت نے فاروق ستار، خواجہ اظہار الحسن ، کنورنوید، عامرخان، قمرمنصوراورشاہدپاشا کی گرفتاریوں اورلیاقت آباد ٹاؤن کے کارکن عارف حسین کی شہادت کی شدید مذمت کرتے ہوئے کہاکہ ایم کیوایم کے کارکنوں کے ماورائے عدالت قتل ،کارکنوں کولاپتہ کرنے اورمظالم کانشانہ بننے والوں کو انصاف فراہم کرنے کے بجائے ایم کیوایم کے سینئر رہنماؤں اور کارکنوں کی گرفتاریاں سراسرظلم ہیں ۔ ندیم نصرت نے کہاکہ یہ ظلم بند ہونا چاہیے ، ایم کیوایم کے رہنماؤں اورکارکنوں کوفی الفوررہاکیاجائے اورمہاجر عوام پر مظالم ڈھانے کاسلسلہ بندکیاجائے ۔ ندیم نصرت نے انسانی حقوق کی تنظیموں سے بھی اپیل کی کہ وہ ان مظالم اورانسانی حقوق کی خلاف ورذیوں پر صدائے احتجاج بلند کریں۔