کوئٹہ سے کراچی آتے ہوئے ایم کیوایم کوئٹہ زونل کمیٹی کے رکن سید نعیم اختر کی پولیس کی جانب سے گرفتاری پر ایم کیوایم رابطہ کمیٹی کا اظہارِ مذمت

کراچی:۔۔۔23؍جولائی2016ء

متحدہ قومی موومنٹ کی رابطہ کمیٹی نے کوئٹہ سے کراچی آتے ہوئے ایم کیوایم کوئٹہ زونل کمیٹی کے رکن سیدنعیم اخترکوپولیس کی جانب سے گرفتار کرنے کی شدید الفاظ میں مذمت کی ہے اورذمہ دارن وکارکنان کی باقاعدہ شناخت کے بعدگرفتاری کے عمل کوایم کیوایم کو دیوار سے لگانے کی گھناؤنی سازش کاتسلسل قراردیاہے۔ایک بیان میں رابطہ کمیٹی نے کہاکہ کوئٹہ زونل کمیٹی کے رکن سید نعیم اختر پولیس نے اس وقت گرفتار کرلیا جب وہ کوئٹہ سے بذریعہ بس کراچی آرہے تھے کہ پولیس نے انہیں موچھکو پرروکا اور بس سے اتار کر نامعلوم مقام پر منتقل کردیا۔ رابطہ کمیٹی نے کہاکہ اس طرح ایم کیوایم کے ذمہ داران وکارکنان بلاجوازگرفتارکرکے ڈرایا ڈھمکایا نہیں جاسکتا۔ انہوں نے کہا کہ سید نعیم اختر پرکوئی مقدمہ نہیں اورنہ ہی وہ کسی مقدمے میں مطلوب ہیں اس کے باوجو دان کی شناخت کے بعدگرفتاری سراسرظلم وزیادتی اور ایم کیوایم کودیوارسے لگانے کاعمل ہے جس کی جتنی مذمت کی جائے کم ہے ۔رابطہ کمیٹی نے کہاکہ اس سے قبل ایم کیوایم کے ذمہ داران وکارکنان کوراستوں سے گرفتارکرکے نامعلوم مقام پرمنتقل کردیاگیاجس کے بعدسے کارکنان وذمہ داران کی بڑی تعداد یاتو لاپتہ ہے یا پھر انہیں بہیمانہ تشدد کا نشانہ بنا کر بے دردی سے شہید کردیا گیا ہے یاپھران پردباؤ ڈال کر وفاداریاں تبدیل کرادی گئیں۔رابطہ کمیٹی نے کہا کہ اس طرح کے سازشی ہتھکنڈوں کاسہارالیکرنہ پہلے ایم کیوایم کوختم کیاجاسکااورنہ اب کیا جاسکتا ہے، ایم کیوایم تمام سازشی ہتھکنڈوں کوڈٹ کرمقابلہ کررہی ہے اورانشاء اللہ تعالیٰ پہلے سے زیادہ طاقتور جماعت بن کرسامنے آئیگی۔رابطہ کمیٹی نے چیف جسٹس سپریم کورٹ،آرمی چیف جنرل راحیل شریف اوروزیراعظم پاکستان میاں محمدنوازشریف سے مطالبہ کیاکہ وہ ایم کیو ایم کوئٹہ زونل کمیٹی کے رکن سید نعیم اخترکی گرفتاری کانوٹس لیں اورانہیں فی الفور بازیاب کروا کرایم کیوایم کودیوارسے لگانے کاعمل بند کروائیں۔