جنرل راحیل شریف پاکستانی حدود میں ڈرون حملہ پر سیاسی جماعتوں کی کانفرنس طلب کریں۔ الطاف حسین

لندن۔۔۔ 24 مئی 2016ء

متحدہ قومی موومنٹ کے قائدجناب الطاف حسین نے چیف آف آرمی اسٹاف جنرل راحیل شریف کو مخاطب کرتے ہوئے کہاکہ پاکستانی حدود میں امریکی حملہ پر قومی اتفاق رائے قائم کی جائے اور اس سلسلے میں تمام سیاسی جماعتوں کی کانفرنس طلب کرکے وہاں جذباتیت کے بجائے غیرت وحمیت پر مبنی فیصلے کیے جائیں۔انہوں نے یہ بات آج ایم کیوایم کے مرکزنائن زیروپررابطہ کمیٹی، ارکان پارلیمنٹ اورتنظیمی شعبہ جات کے ارکان سے خطاب کرتے ہوئے کہی ۔جناب الطاف حسین نے کہاکہ آج وفاقی وزیرداخلہ چوہدری نثارعلی خان نے اپنی پریس کانفرنس میں امریکی حملہ کو بین الاقوامی قوانین کی مکمل خلاف ورزی قرار دیا ہے ۔ اگر ان کے بقول یہ حملہ ، پاکستان کی غیرت وحمیت پر حملہ ہے تو انہیں آج ہی یہ اعلان کردینا چاہیے کہ ہم بھوکے مرجائیں گے لیکن امداد کے نام پر امریکہ سے ایک پیسہ بھی نہیں لیں گے ، اگر ارباب اقتدار باضمیر ہیں تو کھل کرکہیں کہ ہم کاغذ کے جہازبنالیں گے لیکن ہمیں امریکہ کے F-16 طیاروں اور ڈرون طیاروں کی کوئی ضرورت نہیں ہے اورہم اپنے علاقوں میں تیارکیے گئے آتش بازی کے سامان سے آتش بازی کرلیں گے، ہمیں آسمان کی بلندی کی چھونے والی امریکی آتش بازی کی کوئی ضرورت نہیں ہے ۔جناب الطاف حسین نے چیف آف آرمی اسٹاف جنرل راحیل شریف کو مخاطب کرتے ہوئے کہا کہ پاکستانی حدود میں امریکی حملہ پر قومی اتفاق رائے قائم کی جائے اور اس سلسلے میں تمام سیاسی جماعتوں کی کانفرنس طلب کرکے وہاں جذباتیت کے بجائے غیرت وحمیت پر مبنی فیصلے کیے جائیں۔انہوں نے کہاکہ امریکہ نے بین الاقوامی قوانین کی خلاف ورزی کی تو حکمرانوں کی جانب سے کہاگیا کہ ہمیں معلوم نہیں ہے اور ہم صورتحال کاجائزہ لے رہے ہیں ، حکمراں ، امریکہ کے سامنے نہیں بول سکتے لیکن جب الطاف حسین نے کہاکہ آپ ایم کیوایم کے ساتھ ظلم کررہے ہیں ، غریبوں کو پکڑ کرقتل کررہے ہیں تو میری باتوں پرغورکرنے کے بجائے میری تقریراور تصویر پر پابندی عائد کردی گئی۔ میں حسینیت ؑ کا پیروکار ہوں ، حسینی سر کٹ تو سکتا ہے لیکن یزیدیت کے آگے جھک نہیں سکتا۔جناب الطاف حسین نے کہاکہ یہ بات درست ہے کہ آج کرپشن ملک کاسب سے بڑا مسئلہ ہے، کرپشن ملک کی سب سے بڑی بیماری ہے، اس بیماری کاعلاج ہوناچاہیے اورجولوگ کرپشن میں ملوث ہیں ان کااحتساب ہوناچاہیے لیکن اس کیلئے سب سے بڑاسوال یہ ہے کہ اس بیماری کاعلاج کون کرے گا؟ احتساب کس سے کرایا جائے گااور کون کرے گا ؟کیااحتساب کرنے کیلئے آسمان سے فرشتے آئیں گے؟یقیناًفرشتے نہیں آئیں گے توکیامفتی اعظم احتساب کریں گے؟انہوں نے کہاکہ عدلیہ بحیثیت ادارہ بہت ہی قابل احترام ہوتاہے اور ججزبھی قابل احترام ہوتے ہیں لیکن ہمارے ملک میں بدقسمتی سے عدلیہ بھی کرپشن سے محفوظ نہیں ہے ، سپریم کورٹ کے ایک سابق چیف جسٹس جن کی برطرفی پر پورے ملک میں ہنگامہ برپاکیاگیااورجنہیں فرشتہ بناکرپیش کیاوہ بھی کرپشن میں ملوث پائے گئے، اگراحتساب کیلئے فوج کوذمہ داری دی جائے تو فوج کا ادارہ بھی کرپشن سے پاک نہیں ہے اورنہ صرف نچلی سطح بلکہ جرنیلوں تک کی سطح کے لوگ کرپشن میں ملوث پائے گئے ۔جناب الطاف حسین نے کہاکہ یہ سب میرے خلاف اسی لئے ہیں کہ میں حق اورسچ کی بات کرتا ہوں، میں مذہبی انتہاپسندوں کے خلاف ہوں، میرے گھرسے ڈینئل پرل کاقاتل خالدشیخ محمداور القاعدہ اورطالبان کے دیگربڑے بڑے دہشت گردنہیں پکڑے گئے ، اسی لئے میرے گھر نائن زیروپر چھاپے مارے گئے اورمیرے گھرسے کرمنلز پکڑے جانے کے الزامات لگائے گئے جو سراسرجھوٹ ہیں۔ جناب الطا ف حسین نے کہاکہ کرپشن ملک کودیمک کی طرح چاٹ رہی ہے ، کسی بھی ملک کی ترقی ، خوشحالی، سلامتی، مضبوطی، استحکام، امن وامان کی بہترصورتحال، صاف ستھراماحول، صاف غذا، ملاوٹ سے پاک غذا اسی وقت ہوسکتی ہے جب ملک میں کرپشن نہ ہو،جب ملک سے کرپشن کاخاتمہ ہوگاتوملک میں تعلیم کانظام بھی بہترہوگااورنقل کارجحان ختم ہوگا۔ ملک میں لوکل گورنمنٹ سسٹم کی ضرورت پر ذور دیتے ہوئے انہوں نے کہاکہ جس طرح کالج اوریونیورسٹی کی تعلیم کے لئے پرائمری اورسیکنڈری کی تعلیم ضروری ہے اسی طرح لوکل گورنمنٹ سسٹم بھی جمہوریت کی نرسری ہے ،جس طرح اوپرکی منزل تک پہنچنے کے لئے سیڑھی یالفٹ کی ضرورت ہوتی ہے اسی طرح لوکل گورنمنٹ سسٹم کے بغیرکوئی بھی ملک ترقی کی منزلیں طے نہیں کرسکتا۔آج ایشیاہویاافریقہ ، یورپی ممالک ہوںیاامریکہ ، دنیاکاکوئی بھی ملک ایسا نہیں کہ جہاں لوکل گورنمنٹ سسٹم نہ ہولیکن بدقسمتی سے پاکستان میں لوکل گورنمنٹ سسٹم کوپنپنے نہیں دیاجاتااورملک کاسب سے بڑاشہرکراچی آج بھی بلدیاتی نظام سے محروم ہے ۔