ایم کیوایم کے کارکن آفتاب احمداوردیگرکارکنوں کے ماورائے عدالت قتل اورکارکنوں کی جبری گمشدگیوںکے خلاف لندن میں پاکستان ہائی کمیشن کے سامنے ایم کیوایم کا احتجاجی مظاہرہ

لندن ۔۔۔ 8 مئی 2016ء

ایم کیوایم کے رہنماڈاکٹرفاروق ستارکے کوآرڈی نیٹراورایم کیوایم کے سینئرکارکن آفتاب احمداوردیگرکارکنوں کے ماورائے عدالت قتل اورکارکنوں کی جبری گمشدگیوں کے خلاف اتوارکو ایم کیوایم یوکے کے زیراہتمام لندن میں پاکستان ہائی کمیشن پر ایک احتجاجی مظاہرہ کیاگیا۔ مظاہرے میں نوجوانوں، بزرگوں، شعبہ خواتین کی کارکنوں، دیگرہمدردخواتین،یوتھ اوربچوں نے شرکت کی ۔مظاہرے میں ایم کیوایم کی رابطہ کمیٹی کے ارکان مصطفےٰ عزیزآبادی، ڈاکٹرسلیم دانش ، اظہار احمدخان، رابطہ کمیٹی کے معاون منظوراحمد،سینٹرل ایگزیکٹوکمیٹی کے رکن طارق جاوید، ایم کیوایم یوکے کے آرگنائزرہاشم اعظم،جوائنٹ آرگنائزر فیض احمددیگرارکان بھی شریک تھے۔ مظاہرے میں لندن کے ساتھ ساتھ برمنگھم،مانچسٹر،بریڈفورڈ، شیفیلڈ،نوٹنگھم اوردیگرعلاقوں سے تعلق رکھنے والے پاکستانیوں نے شرکت کی ۔ مظاہرین اپنے ہاتھوں میں مختلف پوسٹرز،بینرزاورپلے کارڈزاٹھائے ہوئے تھے جن پر آفتاب احمدشہیدکی تصاویراور ماورائے عدالت قتل ، جبری گمشدگیوں اوردیگرزیادتیوں کے خلاف کلمات درج تھے ۔مظاہرین ظلم وزیادتیوں کے خلاف کافی دیرتک زوردارنعرے لگاتے رہے۔شدیدگرمی اوردھوپ کے باوجودمظاہرین کاجوش وجذبہ قابل دیدتھا۔ اس موقع پرمظاہرین سے خطاب کرتے ہوئے رابطہ کمیٹی کے رکن مصطفےٰ عزیزآبادی نے کہا کہ پاکستان میںآپریشن کے نام پر ایم کیوایم کے کارکنوں اورعام مہاجروں کو ریاستی مظالم کانشانہ بنایاجارہاہے ، ان کاماورائے عدالت قتل کیاجارہاہے، آفتاب احمدکوگرفتارکرکے سرکاری حراست میں جس طرح تشددکانشانہ بناکر قتل کیا گیاوہ ریاستی مظالم کی بدترین مثال ہے۔ انہوں نے کہا کہ ستمبر2013ء سے شروع ہونے والے آپریشن کے دوران آفتاب احمدکی طرح ایم کیوایم کے 60سے زائدکارکنوں کوماورائے عدالت قتل کردیاگیاجبکہ اس دوران گرفتارکئے 170سے زائدکارکنان لاپتہ ہیں۔ انہوں نے چیف آف آرمی اسٹاف جنرل راحیل شریف سے مطالبہ کیاکہ آفتاب احمدکے ماورائے عدالت قتل میں ملوث رینجرزکے اہلکاروں کوگرفتارکیاجائے، ان کے خلاف قتل کامقدمہ درج کیاجائے اورانہیں قرارواقعی سزادی جائے ، اسی طرح لاپتہ کارکنوں کوبھی فی الفوربازیاب کرایاجائے ۔ اس موقع رابطہ کمیٹی کے رکن ڈاکٹرسلیم دانش نے کہاکہ پاکستان میں ایم کیوایم کوریاستی طاقت کے ذریعے کچلنے کی کوشش کی جارہی ہے، اسے دیوارسے لگایاجارہاہے۔ انہوں نے کہاکہ حکومتیں اس طرح ظلم سے نہیں چلاکرتیں، مہاجربھی پاکستانی ہیں، ان کے ساتھ غیروں جیساسلوک نہ کیاجائے اوران کے خلاف ڈھائے جانے والے مظالم بندکئے جائیں۔ یوکے کے آرگنائزرہاشم اعظم نے کہاکہ پاکستان میں ایم کیوایم کے کارکنوں کوجس طرح ماورائے عدالت قتل کیاجارہاہے اورگرفتارکرکے غائب کیاجارہا ہے اس سے برطانیہ میں مقیم پاکستانیوں میں سخت تشویش پائی جاتی ہے لہٰذاریاستی اداروں کی جانب سے ایم کیوایم کے خلاف یہ ظلم بندہوناچاہیے ۔ اس موقع پر برطانیہ میں مقیم پاکستانیوں کی جانب سے وزیراعظم پاکستان میاں محمدنوازشریف کے نام ایک پٹیشن بھی ہائی کمیشن کے حکام کے حوالے کی گئی جس میں ایم کیوایم کے کارکن آفتاب ا حمدکے ماورائے عدالت قتل کے ذمہ داروں کوقرارواقعی سزادینے، ماورائے عدالت قتل، گرفتاریوں اورجبری گمشدگیوں کاسلسلہ بندکرنے کی اپیل کی گئی تھی۔ 






More Pictures