حکومت سندھ کے غیرجمہوری فیصلے کو سندھ ہائی کورٹ کی جانب سے کالعدم قرار دینا حق کی فتح ہے، الطاف حسین

لندن۔۔۔10، فروری 2016ء

متحدہ قومی موومنٹ کے قائد جناب الطاف حسین نے میئر، ڈپٹی میئر، چیئرمین ،وائس چیئرمین اورمخصوص نشستوں کیلئے بلدیاتی نمائندوں کے انتخابات کیلئے حکومت سندھ کے غیرجمہوری فیصلے کو سندھ ہائی کورٹ کی جانب سے کالعدم قراردینے پر حق پرست عوام کو دلی مبارکباد پیش کی ہے اور سندھ ہائی کورٹ کے فیصلے کو حق کی فتح قراردیا ہے۔ ان خیالات کااظہار انہوں نے بین الاقوامی شہرت یافتہ آئینی ماہر بیرسٹر فروغ نسیم سے ٹیلی فون پر گفتگو کرتے ہوئے کیا۔ قبل ازیں جناب الطاف حسین نے عدالت عالیہ سندھ میں پیپلزپارٹی کی صوبائی حکومت کے فیصلے کے خلاف ایم کیوایم کی پٹیشن دائر کرنے اور مدلل انداز میں ایم کیوایم کامقدمہ لڑنے پر بیرسٹر فروغ نسیم کو زبردست خراج تحسین پیش کیا۔ جناب الطاف حسین نے کہاکہ پیپلزپارٹی کی حکومت عددی اکثریت کی بنیاد پر سندھ اسمبلی کے ایوان میں نہ صرف سیاہ قوانین منظورکرارہی ہے بلکہ بلدیاتی اداروں کے اختیارات بھی سلب کررہی ہے جس سے صاف ظاہر ہوتا ہے کہ پیپلزپارٹی آمرانہ ذہنیت کی مالک ہے اور اسے عوام کے بنیادی مسائل کے حل سے کوئی دلچسپی نہیں ہے ۔ جناب الطاف حسین نے کہاکہ اب جبکہ سندھ ہائی کورٹ کی جانب سے سندھ اسمبلی میں مخصوص نشستوں کیلئے بلدیاتی نمائندوں کے انتخابات کے غیر جمہوری فیصلے کو کالعدم قراردیاجاچکا ہے لہٰذا میں سپریم کورٹ سے پرزوراپیل کرتا ہوں کہ صوبہ سندھ میں میئر، ڈپٹی میئر، چیئرمین اور وائس چیئرمین کے انتخابات میں مزید تاخیرنہ کی جائے اور بلدیاتی نمائندوں کے انتخابات جلد سے جلد کرائے جائیں تاکہ سندھ کے شہری عوا م کے بنیادی مسائل حل کیے جاسکیں ۔ جناب الطاف حسین نے حکومت سندھ کے غیرجمہوری فیصلے کو سندھ ہائی کورٹ کی جانب سے کالعدم قراردینے پررابطہ کمیٹی ، ایم کیوایم کے تمام شعبہ جات کے ارکان ، حق پرست عوامی نمائندوں، ایم کیوایم کے تمام ذمہ داران ،کارکنان اور حق پرست عوام بالخصوص بیرسٹرفروغ نسیم سمیت ایم کیوایم کے تمام قانونی مشیروں کو زبردست مبارکباد اور خراج تحسین بھی پیش کیا۔