حق پرست رکن قومی اسمبلی عبدالرشید گوڈیل پر قاتلانہ حملہ کی غیرجانبدارانہ تحقیقات کرائی جائے، رابطہ کمیٹی

کراچی ۔۔۔24، نومبر2015ء

متحدہ قومی موومنٹ کی رابطہ کمیٹی نے مطالبہ کیا ہے کہ حق پرست رکن قومی اسمبلی عبدالرشید گوڈیل پر قاتلانہ حملہ کی تحقیقات کرائی جائے اور اس سازش میں ملوث عناصر کو عوام کے سامنے بے نقاب کیاجائے ۔ ایک بیان میں رابطہ کمیٹی نے کہاکہ مسلح دہشت گردوں نے اگست2015 ء میں ایم کیوایم کے رکن قومی اسمبلی عبدالرشید گوڈیل کو ان کی رہائش گاہ کے قریب فائرنگ کرکے شدید زخمی کردیا تھا۔میڈیا رپورٹس کے مطابق گزشتہ دنوں قانون نافذ کرنے والے اداروں کے ہاتھوں گرفتارہونے والے دہشت گرد نے مبینہ طورپر انکشاف کیا ہے کہ وہ پیپلزپارٹی سے تعلق رکھنے والے شاہد بکک کیلئے کام کرتا ہے اوروہ رشید گوڈیل پر قاتلانہ حملہ سمیت قتل کی متعددوارداتوں میں ملوث ہے ۔رابطہ کمیٹی نے کہاکہ شاہد بکک ، بلدیاتی انتخابات میں ضلع وسطی یوسی 44 سے پیپلزپارٹی کا نامزد امیدوار بھی ہے جبکہ رشید گوڈیل پر حملے میں ملوث دہشت گرد نے مبینہ طورپر ایم کیوایم کے دیگر رہنماؤں کے قتل کی منصوبہ بندی کا بھی اعتراف کیا ہے جس میں حق پرست رکن قومی اسمبلی سلمان مجاہد بلوچ بھی شامل ہیں ۔ رابطہ کمیٹی نے کہاکہ حیرت انگیز بات یہ ہے کہ کراچی میں امن وامان تباہ کرنے کے ذمہ دار جو عناصر سامنے آرہے ہیں ان کا تعلق کالعدم جہادی تنظیموں ، امن کمیٹی، پیپلزپارٹی اور جماعت اسلامی سے ہے لیکن کراچی آپریشن کا نشانہ صرف اور صرف ایم کیوایم اور اس کے کارکنان بنے ہوئے ہیں ۔ رابطہ کمیٹی نے وزیراعظم میاں محمد نواز شریف اور وفاقی وزیرداخلہ چوہدری نثارعلی خان سے مطالبہ کیاکہ عبدالرشید گوڈیل پرقاتلانہ حملے میں ملوث دہشت گرد کے اعترافی بیان کی روشنی میں قاتلانہ حملے کی غیرجانبدارانہ تحقیقات کرائی جائے اور اس سازش میں ملوث عناصر کو عوام کے سامنے بے نقاب کیاجائے ۔