ایم کیوایم کی رابطہ کمیٹی پاکستان اور لندن کے ارکان کا مشترکہ ہنگامی اجلاس

کراچی ۔۔۔21، اگست2015ء

متحدہ قومی موومنٹ کی رابطہ کمیٹی پاکستان اور لندن کے ارکان کا مشترکہ ہنگامی اجلاس ہوا جس میں ایم کیوایم کے تمام شعبہ جات کے ارکان نے بھی شرکت کی ۔ اجلاس میں ایم کیوایم کے ارکان سینیٹ، قومی اور صوبائی اسمبلی کے استعفوں کے حوالہ سے سینئر سیاسی رہنما مولانا فضل الرحمان کی ثالثی میں مذاکرات اور حکومتی رویے کا تفصیلی جائزہ لیاگیا ۔ اجلاس میں ایم کیوایم کے منتخب نمائندوں کے استعفوں ، حکومت سے جاری مذاکرات اور علیحدہ صوبے کیلئے جدوجہد کے حوالہ سے اہم فیصلے بھی کیے گئے ۔ اجلاس کے شرکاء نے گزشتہ روز مورخہ 20، اگست 2015ء کو وزیراعظم پاکستان میاں محمد نوازشریف کی گورنر ہاؤس کراچی میں تشریف لانے کے موقع پر غروروگھمنڈ ، تمکنت اور دھمکی آمیز لب ولہجہ کی سخت ترین الفاظ میں مذمت کی ۔ اجلاس میں کہاگیا کہ انتہائی معتبر ،صلح کار اور بہت بڑی شخصیت مولانا فضل الرحمان تین روز قبل یعنی مورخہ 18، اگست2015ء کو ایم کیوایم کے مرکز نائن زیروعزیزآباد تشریف لائے تھے اور رابطہ کمیٹی کے ارکان سے ملاقات میں یہ طے کیاگیا تھا کہ باقی مذاکرات اسلام آباد میں کیے جائیں گے لیکن گزشتہ روز وزیراعظم میاں محمد نواز شریف نے کراچی آکر غروروتکبر اور دھمکی آمیز لہجہ اختیار کرکے نہ تو مولانافضل الرحمان کے ثالثی کردار کی قدر کی اور نہ ہی کراچی کے لاکھوں غم زدہ اورروتے تڑپتے ہوئے خاندانوں کے زخموں پر مرہم رکھا۔ وزیراعظم میاں نواز شریف نے دھمکی آمیز لہجہ اختیارکرکے کراچی کے مظلوم خاندانوں کے زخموں پر نمک پاشی کا عمل کیاہے لہٰذا ہم اراکین رابطہ کمیٹی بڑے ادب سے مولانافضل الرحمان صاحب کی خدمت میں عرض گزارہیں کہ مصالحت کاری کیلئے ہم ان کی نیک کاوشوں کوقدر کی نگاہ سے دیکھتے ہیں لیکن جس طرح وزیراعظم نوازشریف نے مولانا صاحب کی نیک کاوشوں کو سبوتاژ کیا اور کراچی آکر ایک جملہ تک کہنے کی زحمت گوارانہیں کی کہ مذاکرات کے عمل میں مولانافضل الرحمان ثالث کی حیثیت سے درمیان میں موجود ہیں انشاء اللہ ایم کیوایم کی جائز شکایات یا تحفظات کاحکومت سنجیدگی سے نوٹس لیکر اس کا ازالہ کرنے کی کوشش کرے گی ۔ اجلاس میں کہاگیا کہ ہم رابطہ کمیٹی کے ارکان کی دلی خواہش ہے کہ مولانا فضل الرحمان صاحب ہمارے بزرگ کی حیثیت سے جب چاہیں ہم سے رابطہ کرسکتے ہیں لیکن ہم ان سے انتہائی معذرت کے ساتھ اپیل کرتے ہیں کہ وہ ایم کیوایم اور حکومت کے درمیان مذاکرات کیلئے صلح کار، مذاکرات کار یا ثالث کی حیثیت سے مزید زحمت نہ کریں ۔

اجلاس میں کہاگیا کہ پوری پارٹی کا متفقہ فیصلہ ہے کہ ایم کیوایم کے ارکان سینیٹ ، قومی وصوبائی اسمبلی نے احتجاجاً اپنے استعفے دیدیے ہیں انہیں حکومت کو ہرقیمت پر تسلیم کرنا ہوگااور اس پریس ریلیز کے بعد ایم کیوایم کے ایک ایک منتخب رکن کو تینوں ایوانوں سے مستعفی سمجھا جائے ۔ اجلاس میں متفقہ فیصلہ کیا گیاکہ ایم کیوایم عارضی طورپر پارلیمانی سیاست سے الگ ہوکر اپنی تمام تر توجہ صرف صوبے کے قیام اور فلاحی سرگرمیوں پر مرکوز رکھے گی اور اس کیلئے جدوجہد کرتی رہے گی ۔اجلاس میں چہ پدی اور چہ پدی کے شوربے کے مصداق سندھ کے وزیراعلیٰ سید قائم علی شاہ کے اس رویے کی بھی سخت ترین الفاظ میں مذمت کی گئی جس میں انہوں نے وزیراعظم نوازشریف کے رویے کو دیکھ کر جوش جذبات میں یہ کہہ ڈالا کہ میں کراچی آپریشن کا کپتان ہوں اور میری موجودگی میں مزید تین رکنی مانیٹرنگ کمیٹی بنانے کی کوئی ضرورت نہیں ہے ،میں صرف وہاں بولوں گا جہاں پیپلزپارٹی والوں کو گزند یا زرا سا نقصان پہنچنے کا اندیشہ ہوگا اور وہاں بغلیں اور شادیانے بجاؤں گا جہاں ایم کیوایم اور مہاجروں کو مشق ستم بنایاجائے گا۔ 

دریں اثناء اجلاس میں کہاگیا کہ عوام نے دلگرفتہ ہوکراس بات کا سنجیدگی سے نوٹس لیا کہ وزیراعظم نوازشریف کراچی تشریف لائے لیکن وہ اپنے ہی ایوان کے رکن رشید گوڈیل کی عیادت کیلئے اسپتال نہیں گئے ۔