ایم کیوایم کے قائدتحریک الطاف حسین کی کتاب ’’ سفرزندگی ‘‘ کا اردو،سندھی اورانگریزی کے بعد مراٹھی زبان میں بھی ترجمہ شائع ہوگیا

لندن۔۔۔27، مئی2015ء

متحدہ قومی موومنٹ کے قائد جناب الطاف حسین کے سیاسی فکروفلسفہ کی روشنی پاکستان کے ساتھ ساتھ برصغیر کے دیگر ممالک میں بھی پھیل رہی ہے اوران کے فکروفلسفہ پرمبنی تصانیف اردو،سندھی ، انگریزی اورعربی زبانوں میں شائع ہوچکی ہیں۔ اب انڈیا کے لکھاریوں کی معروف تنظیم SARHAD کے زیراہتمام چنارپبلشرنے جناب الطاف حسین کی سوانح عمری ’’سفرزندگی‘‘ کا مراٹھی زبان میں ترجمہ شائع کیا ہے ۔ چنار پبلشر نے یہ ترجمہ بھارت کی ریاست مہاراشٹر کے شہر پونا میں شائع کیا ہے ۔واضح رہے کہ پاکستان کے معروف پبلشر ’’جنگ گروپ‘‘ نے 1987ء میں جناب الطاف حسین کی سوانح عمری روزنامہ جنگ میں قسط وار شائع کی تھی جسے عوام میں بے پناہ پذیرائی ملی تھی ۔ عوام کے بے حداصرار پر جنگ پبلشر نے بعدازاں اس سوانح عمری کو کتابی صورت میں ’’سفرزندگی‘‘ کے نام سے شائع کیا تھا۔ برطانیہ کے معروف اشاعتی ادارے ’’آکسفورڈ یونیورسٹی پریس ‘‘ نے سفرزندگی کا انگریزی ترجمہMy Life's Journey کے نام سے شائع کیا تھا ۔ اردو ، سندھی اور انگریزی میں اس کتاب کے متعدد ایڈیشن شائع ہوچکے ہیں۔

اپنی اس سوانح عمری میں جناب الطاف حسین نے اپنی تحریک کے پس منظر، اپنے سیاسی فکروفلسفہ ، ابتدائی جدوجہد ، گرفتاریوں، سرکاری حراست میں اٹھائی جانے والی صعوبتوں اور اپنی زندگی کے دیگر امور پر تفصیلی روشنی ڈالی ہے ۔ انہوں نے اس کتاب میں بیان کیا ہے کہ وہ فرسودہ جاگیردارانہ ، وڈیرانہ نظام زندگی اور طرزحکومت کے سخت مخالف ہیں۔ وہ سوشلزم اور کمیونزم کے ساتھ ساتھ بے لگام سرمایہ دارانہ نظام (Uncontrolled Capitlaism) کے بھی مخالف ہیں اور فی زمانہ جمہوریت کو ہی بہترین نظام حکومت سمجھتے ہیں لیکن اس کی کامیابی کے لئے وہ مقامی حکومتوں کے قیام کواس کالازمی جزوسمجھتے ہیں ۔ پاکستان میں نظام کی تبدیلی اورغریب ومتوسط طبقہ کی حکمرانی کے بارے میں جناب الطاف حسین کے حقیقت پسندانہ خیالات سے متاثر ہوکر انڈیا کے ممتاز لکھاری گروپ ’’سرحد‘‘ نے چنار پبلی کیشن کے تحت جناب الطاف حسین کی سوانح عمری ’’سفرزندگی‘‘ کا مراٹھی زبان میں ترجمہ شائع کیا ہے ۔ کتاب کی اشاعت کے موقع پر لکھاریوں کی تنظیم’’ سرحد ‘‘ کے بانی اورصدرسنجے نہرنے ایم کیوایم کے ترجمان سے گفتگو کرتے ہوئے کہا کہ انڈیا میں بھی بہت بڑی تعداد میں عوام جناب الطاف حسین کے فکروفلسفہ ،جدوجہد اوران کی بے مثال قربانیوں سے بہت متاثر ہیں ۔سنجے نہرنے مزید کہا کہ عوام ان کی زندگی ، سیاسی فکروفلسفہ اور جدوجہد کے بارے میں مزید جاننا چاہتے ہیں ۔ انہوں نے ترجمان سے کہاکہ وہ ایم کیوایم کے قائد جناب الطاف حسین کو ممبئی کے دورے کی خاص طورپر دعوت دیتے ہیں کیونکہ ممبئی سمیت پورے ہندوستان کے لوگ جناب الطاف حسین کے سیاسی فکروفلسفہ کو ان کی اپنی زبانی سننا چاہتے ہیں۔