ایم کیوایم نے چارہمدردوں کے اغواء اورقتل کے واقعہ پر کل سندھ بھر میں پرامن یوم سوگ منانے کا اعلان کردیا۔
حق پرست عوام قتل وغارتگری ،کراچی میں صنعتکاروں ، تاجروں اور شادی ہال مالکان سے بھتوں کی وصولی اورانہیں قتل کی دھمکیاں دینے کے خلاف جمعرات کو اپنا کاروبار اورٹرانسپورٹ بطوراحتجاج بند رکھیں، رابطہ کمیٹی کی اپیل
کراچی ۔۔۔5،جون2013ء
متحدہ قومی موومنٹ نے ملیر میں ایم کیوایم کے چار ہمدردوں کے اغواء اور قتل کے المناک واقعہ پر کل بروز جمعرات کو یوم سوگ منانے کا اعلان کیا ہے ۔ ایک بیان میں ایم کیوایم کی رابطہ کمیٹی نے زندگی کے تمام شعبوں سے تعلق رکھنے والے حق پرست عوام سے اپیل کی کہ وہ ایم کیوایم ملیرسیکٹر یونٹ 98 کے بزرگ کارکن عبدالوحید کے صاحبزادے مہتاب شہید ، یونٹ 98 کی کمیٹی کے رکن جاوید سعید کے بھانجے فرحان شہید، ایم کیوایم کے دیگرہمدرد توصیف شہید اور فرحان شہیدکے سفاکانہ قتل ، گزشتہ دنوں ایم کیوایم کے کارکنوں وہمدردوں کے مسلسل قتل عام ، کراچی میں صنعتکاروں ، تاجروں اور شادی ہال مالکان سے بھتوں کی وصولی اورانہیں قتل کی دھمکیاں دینے کے خلاف کل بروزجمعرات پورے سندھ میں پرامن یوم سوگ منائیں اور اس کھلے ظلم وبربریت کے خلاف اپنا کاروبار اورٹرانسپورٹ بطوراحتجاج بند رکھیں۔