رکن قومی اسمبلی جمشید دستی کا قائدایم کیوایم الطاف حسین سے ٹیلی فون پر رابطہ

لندن۔۔۔26، اپریل2015ء

جنوبی پنجاب کے غریب ومتوسط طبقہ سے تعلق رکھنے والے رکن قومی اسمبلی جمشید دستی نے ایم کیوایم کے قائد جناب الطاف حسین سے ٹیلی فون پر رابطہ کرکے انہیں کراچی کے حلقہ این اے 246 کے ضمنی الیکشن اورسندھ میں کنٹونمنٹ بورڈز کے الیکشن میں بھاری اکثریت سے کامیابی پر دلی مبارکباد پیش کی ۔ جمشید دستی نے جناب الطاف حسین سے گفتگو کرتے ہوئے کہاکہ ایم کیوایم بھرپورعوامی قوت ہے ،الیکشن میںآپ کی شاندار کامیابی نے ایم کیوایم پر الزامات لگانے والوں کو غلط ثابت کردیا ہے، ایم کیوایم کے خلاف منفی پروپیگنڈے کرنے والی تحریک انصاف اور جماعت اسلامی کو بری طرح شکست ہوئی اور حق کی فتح ہوئی ہے جس پر میں آپ ، آپ کی جماعت کے رہنماؤں ، کارکنوں اورہمدردوں کو دلی مبارکباد پیش کرتا ہوں۔ جناب الطاف حسین نے رکن قومی اسمبلی جمشید دستی کا شکریہ ادا کرتے ہوئے انہیں بھی مبارکباد پیش کی ۔ انہوں نے کہاکہ یہ کامیابی ملک بھر کے غریب ومتوسط طبقہ کی کامیابی ہے ۔ پاکستان میں دوفیصد جاگیردارطبقہ نے آپس میں رشتہ داریاں قائم کرکے ایک خاندان کی شکل اختیار کررکھی ہے اوریہ چند خاندان اقتدار میں آکرملک بھرکے مظلوم عوام کے بنیادی حقوق غصب کرتے رہے ہیں ۔ وقت کا تقاضہ ہے کہ ملک بھرکے غریب ومتوسط طبقہ سے تلق رکھنے والے محکوم عوام بھی متحد ہوکر ایک خاندان کی شکل اختیار کریں اور ملک سے فرسودہ جاگیردارانہ نظام اور ظالم وسفاک جاگیرداروں ،وڈیروں اور سرداروں سے نجات کیلئے مشترکہ جدوجہد کریں۔ جمشید دستی نے جناب الطاف حسین کے خیالات سے اتفاق کرتے ہوئے کہاکہ ملک سے ظلم وجبرکے فرسودہ نظام کے خاتمہ بغیرپاکستان اور اسکے عوام ترقی نہیں کرسکتے ۔ دونوں رہنماؤں کے درمیا ن گفتگوباہمی دلچسپی کے مختلف امورپر بھی تبادلہ خیال ہوا۔