قائم علی شاہ کی جانب سے شہیدوں کے لواحقین کے احتجاجی دھرنے کو حملہ قرارد ینا انتہائی شرمناک ہی نہیں بلکہ شہیدوں کے لواحقین کے زخموں پر نمک پاشی ہے۔ رابطہ کمیٹی متحدہ قومی موومنٹ

کراچی۔۔۔ 27 جنوری 2015ء

متحدہ قومی موومنٹ کی رابطہ کمیٹی نے چیف منسٹرہاؤس پر ایم کیوایم کے شہیدکارکنوں کے لواحقین کے احتجاجی دھرنے کو وزیراعلیٰ سندھ سیدقائم علی شاہ کی جانب سے حملہ قراردینے کی شدیدمذمت کرتے ہوئے کہاہے کہ وزیراعلیٰ سندھ کایہ بیان انتہائی شرمناک ہی نہیں بلکہ پولیس کے ہاتھوں ماورائے عدالت قتل کئے جانے والوں کے زخموں پر نمک پاشی ہے ۔اپنے ایک بیان میں رابطہ کمیٹی نے کہاکہ 11 جنوری 2015ء کو ایم کیوایم کے شہید کارکنوں کے سوگوارلواحقین نے پولیس کے ہاتھوں ماورائے عدالت قتل کے واقعات پر وزیراعلیٰ ہاؤس پر پرامن احتجاجی دھرنادیاتھا۔رات بھریہ پرامن دھرناجاری رہاہے جس کے دوران شہیدوں کی بیوائیں، یتیم بچے، مائیں ، بہنیں، بزرگ، بھائی اوردیگرلواحقین روتے رہے ، انصاف کی دہائیاں دیتے رہے اوراس آس میں بیٹھے رہے کہ وزیراعلیٰ سندھ اپنے محل سے باہرآکرشہیدوں کے لواحقین کودلاسہ دیں گے، ان کے سرپرہاتھ رکھیں گے اورانہیں انصاف فراہم کرنے کیلئے اقدامات کریں گے لیکن نہ تووزیراعلیٰ سندھ آئے اورنہ ہی ان کے کسی وزیرنے باہرآکرشہیدوں کے لواحقین کی فریاد سنی ۔رابطہ کمیٹی نے کہاکہ اپنی اس بے رحمی اورسفاکیت پر شرمندہ ہونے کے بجائے آج وزیراعلیٰ سندھ قائم علی شاہ نے شہیدوں کے لواحقین کے دھرنے کوحملہ قرار دیدیا جو انتہائی شرمناک ہے ۔شہیدوں کے لواحقین کے ماتم اورگریہ زاری کو حملہ قر اردے کروزیراعلیٰ سندھ نے شہیدوں کے لواحقین کے زخموں پر نمک پاشی کی ہے ۔رابطہ کمیٹی نے کہاکہ وزیراعلیٰ قائم علی شاہ سے سوال کیاکہ یہ کیساحملہ تھاکہ اس کے دوران وزیراعلیٰ ہاؤس پر ایک کنکرتک نہیں ماراگیا؟ یہ کیساحملہ تھاکہ جس میں شریک افراد نے اپنے کاندھوں پر اسلحہ کے بجائے شہداء کے جنازے اٹھارکھے تھے؟یہ کیساحملہ تھاکہ اس میں شہیدوں کی روتی پیٹی مائیں، بہنیں، یتیم بچے ، بوڑھے والدین ،بھائی اورشہیدوں کے لواحقین شامل تھے؟ رابطہ کمیٹی نے کہاکہ وزیراعلیٰ قائم علی شاہ کواپنے گریبان میں جھانکناچاہیے اوراپنے شرمناک بیان پر شہیدوں کے لواحقین سے معافی مانگنی چاہیے۔رابطہ کمیٹی نے کہاکہ قائم علی شاہ نے آج سندھ اسمبلی میں اپنی تقریرمیں پولیس مظالم کی جس طرح بھرپور حمایت کی ہے اس سے ثابت ہوگیاہے کہ کراچی سمیت سندھ بھرمیں پولیس کے ہاتھوں ایم کیوایم کے کارکنوں اوردیگرلوگوں کے ماورائے عدالت قتل اورسرکاری حراست میں تشدداورظلم وبربریت کے تمام واقعات وزیراعلیٰ سندھ کی ایماء پر کئے جارہے ہیں۔