ایم کیو ایم رابطہ کمیٹی کی پاپوش نگرمیں پولیس اہلکار کے قتل کی سخت الفاظ میں مذمت

کراچی ۔۔۔26جنوری 2015ء

متحد ہ قومی موومنٹ کی رابطہ کمیٹی نے پاپوش نگر یوسی 11میں دہشت گردوں کی فائرنگ سے پولیس اہلکار کے قتل کی سخت الفاظ میں مذمت کی ہے۔ایک مذمتی بیان میں رابطہ کمیٹی نے کہاکہ شہر میں روزانہ کی بنیادوں پر عام شہریوں ، ایم کیو ایم کے کارکنان ، پولیس و رینجرز اہلکاروں ، تاجروں ، ڈاکٹرز ودیگر شعبہ ہائے زندگی سے تعلق رکھنے والے پروفیشنلز کا کھلے عام قتل جاری ہے لیکن سندھ کے وزیر اعلیٰ اور پیپلز پارٹی حکومت کے وزراء الزام تراشیوں اور تنقیدبرائے تنقید کی سیاست کر رہے ہیں ۔انہوں نے کہاکہ لگتا ہے شہر میں دہشت گردوں کو آزادی سے گھومنے اور اپنی مذموم کارروائیوں کا پرمٹ لائسنس دیدیا گیا ہے اور وہ جب جہاں چاہتے ہیں کسی کو بھی نشانہ بنا ڈالتے ہیں ، رابطہ کمیٹی نے کہا کہ سندھ حکومت کی جانب سے بڑے بڑے دعوے کئے جارہے ہیں اور شہرمیں ٹارگٹ کلنگ میں کمی کا راگ الاپا جارہا ہے جبکہ حقیقتاً کراچی میں روزانہ معصوم شہریوں اور قانون نافذ کرنیوالے اداروں کے افسران و اہلکاروں کا قتل معمو ل کی بات بن چکا ہے لیکن سندھ کی صوبائی حکومت اس قتل عام کو روکنے کیلئے اپنی ذمہ داریا ں ادا کرنے میں مکمل طور سے ناکام ہوچکی ہے۔انہوں نے کہا کہ سندھ حکومت نے پولیس کے محکمے کو بھی اپنی کرپشن کا نشانہ بنادیا ہے اور سندھ حکومت کی جانب سے پولیس اہلکاروں کو تحفظ فراہم کرنے کے بجائے انہیں دی گئی بلٹ پروف گاڑیوں اور بلٹ پروف جیکٹوں میں بھی کرپشن کی جارہی ہے ۔ رابطہ کمیٹی نے کہاکہ کراچی کا المیہ ہے کہ نہ تو یہاں کہ شہریوں کو صوبائی حکومت کی جانب سے تحفظ فراہم کیا جارہا ہے اور نہ ہی شہریوں کواپنے تحفظ کیلئے حفاظتی اقدامات کی اجازت دی جارہی ہے۔رابطہ کمیٹی نے وزیر اعظم میاں محمد نواز شریف اور وفاقی وزیر داخلہ چوہدری نثار علی خان سے مطالبہ کیا کہ وہ کراچی میں جاری قتل عام او ر اس پرسندھ حکومت کی بے حسی و غیر سنجیدہ رویے کا نوٹس لیکر شہر یوں کے تحفظ کیلئے ٹھوس اقدامات کریں ۔
English