سندھ پبلک سروس کمیشن کے تحت کراچی سے تعلق رکھنے والے امیدواروں کے انٹرویوزاندورن سندھ منتقل کرنے پر رابطہ کمیٹی کااظہار تشویش

کراچی۔۔۔۔24جنوری2015ء

متحدہ قومی موومنٹ کی رابطہ کمیٹی نے سندھ پبلک سروس کمیشن کے تحت کراچی سے تعلق رکھنے والے امیدواروں کے ہونے والے انٹرویوزکواندورن سندھ منتقل کرنے پرگہری تشویش کا اظہارکر تے ہوئے مطالبہ کیاہے کہ ان انٹرویوز کو فوری طور پر واپس کراچی منتقل کیا جائے۔اپنے ایک بیان میں رابطہ کمیٹی نے کہا کہ سندھ پبلک سروس کمیشن کے تحت انٹرویوز کی اندرون سندھ منتقلی کے متعصبانہ عمل اور کراچی دشمنی پر مبنی فیصلے پر حکومت سندھ سے شدید احتجاج اور فیصلے کی بھر پور مذمت کر تے ہیں ۔انہوں نے کہاکہ ذوالفقار علی بھٹوکے دور میں کوٹہ سسٹم نافذ کرکے سندھ کے شہری علاقوں کے ساتھ زیادتی کی گئی جوکہ شہری علاقوں کے ساتھ متعصبانہ عمل تھاسندھ میں کوٹہ سسٹم دس سال کے لئے نافذ کیا گیا تھاجو کئی دہائیاں گزرنے باوجودآج تک نافذالعمل ہیں جو سندھ کے شہری علاقوں کے ساتھ صریحاً زیادتی وعصبیت ہے۔ انہوں نے کہاکہ گزشتہ دونوں سندھ بپلک سروس کمیشن کے سابق چیئرمین جسٹس (ر)آغارفیق کا اپنے عہد ے سے استعفی دینا انتہائی غور طلب بات ہے ۔ رابطہ کمیٹی نے گورنر سندھ ڈاکٹر عشرت العباد اور وزیر اعلی سندھ سید قائم علی شاہ مطالبہ کیا کہ سندھ پبلک سروس کمیشن کے تحت ہونے والے انٹرویوز کو فوری طور پر واپس کراچی منتقل کیا جائے اور کراچی دشمنی کے اقدامات کے سلسلے کو بند کیا جائے ۔