ایم کیو ایم کینیڈا کا پشاور میں آرمی اسکول کے معصوم طالبعلموں اور اساتذہ کے سفاکانہ قتل عام کی شدیدمذمت

اجلاس میں سانحہ پشاور کے شہداء کے لئے دعائے مغفرت اور زخمیوں کی صحت یابی کیلئے دعا کی گئی

کنیڈا،17؍ دسمبر 2014ء

ایم کیو ایم کینیڈا کے ایک ہنگامی اجلاس آج ہوا ۔ اجلاس میں کینیڈا کے تمام چیپٹر ز انچارجز‘ سینٹرل کمیٹی کے اراکین اور کارکنان نے شرکت کی ۔ اجلاس میں پشاور کے آرمی اسکول میں معصوم طالبعلموں ‘ اساتذہ‘ پولیس اور آرمی کے اہلکاروں کے بے رحمانہ اور سفاکانہ قتل عام کی شدید مذمت کی گئی۔اجلاس سے گفتگو کرتے ہوئے سینٹرل آرگنائیزر کینیڈا آصف قاضی نے کہا کہ اس افسوس ناک واقع پر کینیڈا بھر میں تنظیمی سر گرمیاں تین روز کے لئے معطل رہیں گی۔اور تمام چیپٹرز میں احتجاجی مذمتی پروگرامز منعقد کئے جائیں گے جسکی تفصیلات جلد ہی جاری کر دی جائیں گی۔اس موقع پر انہوں نے کہا کہ کہ جسطرح دہشت گردوں نے درجنوں معصوم بچوں و اساتذہ کا قتل عام کیا ہے یہ اس بات کی نشاندہی کرتا ہے کہ ان لوگوں کا کوئی دین و مذہب نہیں ۔انہوں نے مزید کہا کہ اس واقع کے بعد قائد تحریک الطاف حسین کی اس بات کی تائید ہوتی ہے کہ دہشت گردوں سے نمٹنے کا صرف ایک ہی طریقہ ہے کہ پوری قوم اپنے تمام تر سیاسی و مذہبی اختلافات کو بھلا کر فوج کے ساتھ کھڑی ہو اور ان دہشت گردوں کے خلاف بھرپور کاروائی کی جائے اور یہ آپریشن ضرب عضب اور خیبر ون کو اُس وقت تک جاری رکھاجائے جب تک دہشت گردوں کو صفحہ ہستی سے قلع قمع نہ ہوجائے۔انہوں نے کہا کہ دہشت گردوں کے ساتھ ان حالات میں بھی بعض سیاست دانوں اور مذہبی لیڈران کی جانب سے بات چیت کے ذریعے معاملات کو حل کرنے کی باتیں سوچ سے بالا تر ہیں۔اجلاس کے آخر میں تمام شہداء کے لئے دعائے مغفرت اور زخمیوں کی جلد صحت یابی کی لئے دُعائیں کی گئیں۔