تھر کے مسئلے کو ہنگامی بنیادوں پر حل کرنے کی ضرورت ہے ، ڈاکٹر خالد مقبول صدیقی

کراچی۔۔۔۔13نومبر2014ء

متحد ہ قومی موومنٹ کے وفد نے جناب الطاف حسین کی جانب سے کراچی میں مسلم لیگ فنکشنل کے سربراہ اور حروں کے روحانی پیشوا پیر پگارا پیر صبغت اللہ شاہ راشدی سے انکی رہائشگاہ پر ملاقات کر کے ملک کی سیاسی صورتحال بالخصوص تھر میں وقحط کی صورتحال سمیت باہمی دلچسپی کے مختلف امور پر تفصیلی تبادلہ خیال کیا ۔ وفد کی سربراہی ایم کیوایم رابطہ کمیٹی کے ڈپٹی کنوینر ڈاکٹر خالد مقبول صدیقی کررہے تھے جبکہ وفد میں ایم کیو ایم رابطہ کمیٹی کے رکن بابر خان غوری، معاون رابطہ کمیٹی وسیم اختر ،معاون رابطہ کمیٹی غازی صلاح الدین اور حق پرست رکن صوبائی اسمبلی ڈاکٹر صغیر احمد شامل تھے ۔ اس موقع پر میڈیا نمائندگان سے گفتگو کرتے ہوئے ڈاکٹر خالد مقبول صدیقی نے کہا کہ مسلم لیگ فنکشنل سندھ کی ایک اہم سیاسی جماعت ہے، گزشتہ ادوار میں ایم کیو ایم اور فنکشنل لیگ ہمراہ رہے ہیں اور ہمارے وفد کی یہاں آمد کا مقصد پیر صاحب سے پاکستان بالخصوص تھر میں قیمتی انسانی جانوں کے ضیائع او ر صوبائی حکومت کی بے حسی کے متعلق تبادلہ خیال کرنا ہے ۔ انہوں نے کہا کہ ایم کیو ایم کا موؤف ہے کہ تھر کے مسئلے کو مل بیٹھ کر ہنگامی بنیادوں پر حل کرلیا جائے اور وہاں بھوک ، افلاس ، غربت کا شکار معصوم عوام کے مسائل کا حل نکالا جا سکے ۔انہوں نے کہا کہ تھر میں انسانی المیہ جنم لے چکا ہے اور صوبائی حکومت کے سربراہ وزیر اعلیٰ سندھ اس انسانی معاملے پر سیاسی بیانات دے رہے ہیں گزشتہ روز سولگژری گاڑیوں پر مشتمل قافلے کی تھر آمدمحض فوٹو سیشن بھی اس بے حسی کی کڑی ہے اور اس سے تھر کے بے بس عوام کے زخموں پر نمک پاشی ہوئی ہے۔انہوں نے کہا کہ ایم کیو ایم اور مسلم لیگ فنکشنل مل کر سندھ کے دیہی اور شہری علاقوں کے درمیان اختلافات اور نفرتوں کا خاتمہ یقینی بنائیں گے ۔ اس موقع پر پیر پگارا پیر صبغت اللہ شاہ راشدی نے میڈیا سے گفتگو میں کہا کہ آج ایم کیوایم کے وفد کی یہاں آمد خوش آئند ہے اور میں انکل الطاف کی جانب سے بھیجے گئے وفد کو خوش آمدید کہتا ہوں ۔ انہوں نے کہا کہ میرے والد مرحوم جناب الطاف حسین کو انکل الطاف کے نام سے پکارتے تھے اور اسی احترام میں میں بھی ایم کیو ایم کے قائد کو انکل الطاف کہتا ہوں ۔ پیر صاحب پگارا نے کہا کہ گزشتہ 5،7 برسو ں سے سندھ کی صورتحا ل پستی کی طرف گئی ہے اور اگر تھر کے معاملے کو سنجیدگی سے نہ لیا گیا تو پیپلز پارٹی کی حکومت میں جلد ہی آئندہ وقت میں پورا سندھ تھر کی تصویر پیش کر رہا ہوگا۔ انہوں نے کہا کہ حکومت سندھ بتائے کہ کس نے تھر میں گندم کی بوریوں میں مٹی بھیجی تھی ، سندھ میں تمام اداروں کی صورتحال انتہائی خراب ہو چکی ہے اور وزیر اعلیٰ سندھ سید قائم علی شاہ کے اپنے حلقے میں امن و امان کی صورتحال یہ ہے کہ وہاں کے عوام رات میں سفر کرنے کو غیر محفوظ سمجھتے ہیں اور سندھ کے دیگر علاقوں کا حال بھی ایسا ہی ہے ۔ایک سوال کے جواب میں انہوں نے کہا کہ پنجاب ملک کا سب سے بڑا صوبہ ہے اور وہاں سرائیکی بیلٹ کے عوام اپنے لئے صوبے کا مطالبہ کر رہے ہیں لہٰذا انہیں یہ حق ملنا چاہئے اور پنجاب میں اس کے علاوہ بھی مزید 2صوبے بننے چاہئیں جس کے بعد سندھ کی باری آئے گی ۔ انہوں نے کہا کہ ملک کے آئین میں صوبوں کی تشکیل کے لئے طریق�ۂ کار وضح ہے لہٰذا اس معاملے پر بحث مباحثہ نہیں ہونا چاہئے ۔