ایم کیو ایم کینیڈا کے زیراہتمام قائدتحریک الطاف حسین کی مکمل صحت و سلامتی کیلئے وڈیولنک کے ذریعے دعائیہ پروگرام

ٹورنٹو …15 فروری  2021

ایم کیو ایم کینیڈا کے زیراہتمام اپنے محبوب قائدتحریک جناب الطاف حسین کی مکمل صحت و سلامتی کیلئے دعا، کرونا وائرس سے صحتیابی کے بعد دعائے تشکر اور کووڈ-19 سے آگاہی پروگرام کا انعقادکیاگیا۔ یہ پروگرام زوم ویڈیو لنک کے ذریعے کیا گیا تھا جس میں جس میں ممبرکینیڈا کے ساتھ ساتھ امریکہ، برطانیہ، ساؤتھ افریقہ اوردیگراوورسیزیونٹوں سے تعلق رکھنے والے ذمہ داران و کارکنان کی بڑی تعداد نے شرکت کی۔پروگرام میں مرکزی رابطہ کمیٹی کے رکن مصطفی عزیز آبادی ، سینٹرل ایگزیکٹو کمیٹی کے ممبران شاہدمصطفےٰ،آصف قاضی نے بھی شرکت کی۔ پروگرام کی میزبانی ایم کیوایم کینیڈاکے سینٹرل آرگنائزر مسعود حسن نے جبکہ ان کی معاونت جوائنٹ آرگنائزر اقبال بہادراوردیگراراکین کمیٹی نے کی۔ اس دعائیہ تقریب کاآغاز تلاوت کلام پاک سے کیا گیا۔تقریب کے دوحصے تھے ،پہلے حصے میں ناظرین کودنیابھرمیں پھیلنے والے خطرناک اورمہلک ترین کوروناوائرس سے آگاہی فراہم کرنے کے لئے مخصوص کیاگیاتھا۔ اس حصے میں کینیڈاکے سینئرڈاکٹرعدنان صدیقی نے مختلف چارٹ کے ذریعے کوروناوائرس کی خصوصیات، وائرس کے پھیلنے کے اسباب،ذرائع، انسانی زندگی پر اس کے پڑنے والے جان لیوا اور مہلک ترین اثرات، اس کے علاج اوراس وائرس سے بچاؤ کے طریقے اوراحتیاطی تدابیر پر تفصیلی روشنی ڈالی۔ ڈاکٹرعدنان صدیقی نے کوروناوائرس سے بچاؤ کے لئے لگائی جانے والی ویکسین اوراس کے بارے میں پائے جانے والے خدشات اورتحفظات سے متعلق سوالات کے بھی تسلی بخش جوابات دیے ۔انہوں نے ویکسین کے بارے میں بعض خدشات کوسراسر غلط قراردیااوروائرس سے بچاؤ کے لئے ویکسین لگانے کووقت کی اہم ضرورت قراردیا۔ انہوں نے کہاکہ احتیاط کے تمام تسلیم شدہ طریقوں کواختیارکرکے اوراس حوالے سے نافذکی جانے والی پاپندیوں پر عمل کرکے کورونا کے مہلک وائرس سے محفوظ رہاجاسکتاہے ۔ تمام شرکاء نے کووڈ-19 سے آگاہی کے حوالے سے ڈاکٹر عدنان کی بریفنگ کو نہایت اہم قرار دیااور اس حوالے سے مفید معلومات کو تمام ہی شرکا نے پسند کیا۔ پروگرام کے دوسرے حصے میں تمام شرکاء نے ایم کیوایم کے بانی وقائدجناب الطاف حسین کی صحتیابی اوراسپتال سے گھر منتقل ہونے پاللہ تعالیٰ کے حضورشکرانہ اداکیا۔ اس موقع پر اظہارخیال کرتے ہوئے رابطہ کمیٹی کے رکن مصطفی عزیز آبادی نے کہاکہ قائد تحریک الطاف حسین نے اپنی علالت میں بھی اپنے کارکنوں اور عوام کے بارے میں سوچا، ان کی خبرگیری کی اور اس بیماری کی آزمائش کابھی ہمت وحوصلے سے سامنا کیا۔ انہوں نے کہاکہ اللہ تعالیٰ کے فضل وکرم اورکارکنان وعوام کی دعاؤں کی بدولت قائدتحریک الطاف حسین علالت کے تکلیف دہ مرحلے سے باہر آئے ،اللہ تعالیٰ نے قائدتحریک کونئی زندگی بخشی جس پر ہم اللہ تعالیٰ کاجتنا شکر ادا کریںکم ہے۔ انہوں نے کہاکہ قائدتحریک الطاف حسین کواپنے ساتھیوںاورعوام سے سچاپیار ہے اورانہوں نے اسپتال سے گھر منتقلی کے بعدبھی سب سے پہلے اپنے کارکنان کی خیریت دریافت کی اورسبھی کے لئے دعاکی جوکارکنان وعوام سے انکی بے لوث محبت کا ثبوت ہے۔اس موقع پر سینٹرل ا یگزیکٹوکمیٹی کے رکن شاہدمصطفےٰ، ایم کیوایم کینیڈا کے سینٹرل آرگنائزر مسعودحسن، ایم کیوایم امریکہ کے قائم مقام آرگنائزر مطلوب زیدی، برطانیہ کے آرگنائزر سہیل خانزادہ، ساؤتھ افریقہ کے آرگنائزر محمدیوسف اوردیگرذمہ داروں نے اپنے خیالات کااظہارکرتے ہوئے قائد تحریک جانب الطاف حسین کی صحت میں بتدریج بہتری پر اطمینان کا اظہار کرتے ہوئے کہا کہ آج دنیا بھر میں پھیلے ہوئے کارکنان، مائیں، بہنیں، بزرگ اوربچے اپنے قائد کے دیوانے اور چاہنے والے دعا گو ہیں کہ اللہ تعالی قائد تحریک جناب  الطاف حسین بھائی کو مکمل صحت و سلامتی عطا فرمائے آمین۔تمام ذمہ داران و کارکنان نے اس بات کا بھی اعادہ کیا کہ ہم سب قائد تحریک جناب الطاف حسین کی قیادت میں اپنی منزل تک پہنچیں گے۔ اس موقع پر ذمہ داران و کارکنان کا جوش و خروش قابل دید تھا اور ترانوں کے ساتھ پر جوش نعروں سے اپنے محبوب قائد سے اپنی والہانہ محبت کا اظہار کرتے رہے۔ آخر میں ایم کیوایم کینیڈا کے مرکزی فائنانس سیکریٹری محمد ایوب نے قائد تحریک جناب الطاف حسین بھائی کی صحت و سلامتی اور شہدا کے بلند درجات کے علاوہ خصوصی دعا کرائی۔

٭٭٭٭٭