مولاناسمیع الحق کا بہیمانہ قتل ایک بڑا قومی سانحہ ہے۔ الطا ف حسین

لندن ۔۔۔ 2 نومبر 2018ء

ایم کیوایم کے بانی وقائدجناب الطاف حسین نے جمعیت علمائے اسلام ( س ) کے امیر اورممتاز سیاسی ومذہبی رہنما مولاناسمیع الحق کے بہیمانہ قتل کی شدید مذمت کی ہے ۔ اپنے ایک بیان میں جناب الطاف حسین نے کہاکہ مولاناسمیع الحق پاکستان کی ایک سینئر سیاسی ومذہبی شخصیت تھے جن کے پورے ملک میں لاکھوں چاہنے والے موجودہیں، ان کابہیمانہ قتل ایک بڑا قومی سانحہ ہے جس کے باعث انکے چاہنے والے اورتمام عوام اس سانحہ پر دکھ اورصدمے میں مبتلاہیں ۔ جناب الطاف حسین نے کہاکہ اس قتل کے بارے میں جومعلومات میڈیاکے ذریعے سامنے آرہی ہیں اس کے پیش نظرضرورت اس بات کی ہے کہ اس بہیمانہ قتل کی اعلیٰ سطحی تحقیقات کرائی جائے اور قاتلوں کوگرفتارکرکے کڑی سے کڑی سزادی جائے ۔ جناب الطاف حسین نے مولاناسمیع الحق شہید کے صاحبزادوں، دیگراہل خانہ ، انکے کارکنوں،تمام عقیدت مندوں اورحامیوں سے دلی تعزیت کرتے ہوئے کہاکہ میں اورایم کیوایم کے تمام کارکنان اس سانحہ پر آپ کے غم میں برابرکے شریک ہیں۔ انہوں نے دعاکی کہ اللہ تعالیٰ مولاناسمیع الحق کی مغفرت فرمائے، انہیں جنت الفردوس میں جگہ دے اورتمام سوگواروں کویہ صدمہ برداشت کرنے کاحوصلہ اورصبرجمیل عطاکرے۔