پاکستان میں محنت کش طبقہ کے مسائل کا واحد حل فرسودہ جاگیردارانہ،وڈیرانہ اورسرمایہ دارانہ نظام کاجڑسے خاتمہ ہے،لطاف حسین

لندن ۔۔۔ یکم؍ مئی 2016ء 

متحدہ قومی موومنٹ کے قائدجناب الطاف حسین نے کہاہے کہ محنت کش طبقہ کسی بھی معاشرے کی تکمیل کیلئے ریڑھ کی ہڈی کی مانندہوتاہے جس کے بغیر معاشرے کی تعمیروترقی ناممکن ہے اس لئے ان کی شراکت و شمولیت کو یقینی بنایا جائے ۔یہ بات انہوں نے یکم مئی ’’محنت کشوں کے عالمی دن ‘‘کے موقع پر اپنے ایک خصوصی پیغام میں کہی ۔انہوں نے کہا کہ بد قسمتی سے پاکستان میں رائج فرسودہ جاگیردارانہ ، وڈیرانہ اور سردارانہ نظام کے باعث محنت کشوں کوان کے جائزحقوق سے محروم رکھاجارہاہے اوراس طبقے کیلئے ایسی پالیسیاں اختیار کی جاتی رہی ہیں جس کے باعث محنت کش طبقہ نہ صرف معاشی بحران بلکہ شدیدبدحالی کا شکار ہیں اور ہرگزرتے دن کے ساتھ ان میں مایوسیاں و محرومیاں بڑھتی جارہی ہیں۔ انہوں نے کہاکہ پاکستان میں محنت کش طبقہ کے مسائل کا واحد حل فرسودہ جاگیردارانہ،وڈیرانہ اورسرمایہ دارانہ نظام کاجڑسے خاتمہ ہے ۔انہوں نے کہاکہ ایم کیوایم واحدجماعت ہے جس نے محنت کشوں کے جائزحقوق کیلئے ملک میں سب سے پہلے صدائے احتجاج بلند کی اورانہیں جائزحقوق کے حصول کیلئے لیبرڈویژن کی صورت میں ایم کیوایم کا پلیٹ فارم بھی مہیاکیا۔انہوں نے کہا کہ ضرورت اس امر کی ہے کہ مختلف شعبوں میں محنت کشوں کے ساتھ کی جانیوالی زیادتیاں اورناانصافیاں کے خاتمہ کیلئے عملی اقدامات بروئے کار لائے جائیں ۔انہوں نے کہاکہ صنعتی پیدواری اداروں میں ٹھیکیداری نظام سے مزدروں کو معاشی قتل عام ہو تا ہے جس کی ازالے کے لئے صنعتی پیدواری اداروں سے ٹھیکیداری نظام ختم کرکے مزدورں کو تحفظ فراہم کیا جائے۔