ایم کیوایم کی رابطہ کمیٹی نے حلقہ این اے 246سے کنورنویدجمیل کواپناامیدوارنامزدکردیا

کراچی ۔۔۔ 29 مارچ 2015 ء

ایم کیوایم نے قومی اسمبلی کے حلقہ این اے 246 ( فیڈرل بی ایریا، لیاقت آباد ) کے لئے ایم کیوایم کے سینئررہنمااوررابطہ کمیٹی کے رکن کنورنویدجمیل کواپناامیدوارنامزدکردیاہے ۔ اس بات کااعلان قائدتحریک جناب الطاف حسین نے آج لال قلعہ گراؤنڈ عزیزآباد میں فیڈرل بی ایریااور لیاقت آبادسیکٹرزکے ذمہ داران وکارکنان کے اجلاس سے خطاب کرتے ہوئے کیا۔ اجلاس میں اراکین رابطہ کمیٹی ، حق پرست سینیٹرز، ارکان قومی وصوبائی اسمبلی اور مختلف شعبہ جات کے ذمہ داران بھی شریک تھے ۔ جناب الطا ف حسین نے کہا کہ ایم کیوایم کے امیدوار کنورنوید جمیل ،ایم کیوایم کے سینئر کارکن ہیں وہ حیدرآبادکے ناظم ، رکن قومی اسمبلی اور رکن سندھ اسمبلی بھی رہ چکے ہیں اور اب رابطہ کمیٹی نے انہیں عوام کی خدمت کیلئے NA-246 سے نامزد کیا ہے جس کی میں توثیق کرتا ہوں۔ جناب الطاف حسین نے کہاکہ کنورنوید جمیل خطرات کی پرواہ کیے بغیراپنے حلقہ انتخاب کا دورہ کریں گے ، گلی گلی جاکر عوام سے ملاقات کریں گے اور عوام کے مسائل سنیں گے اور انہیں حل کرنے کیلئے بھرپورکردار ادا کریں گے ۔ جناب الطاف حسین نے قومی اسمبلی کے حلقہ این اے 246 سے ایم کیوایم کے نامزدامیدوار کنورنوید جمیل کو ہدایت کی کہ وہ سب سے حسن سلوک سے پیش آئیں، گھرگھر جاکر عوام کے مسائل سنیں، سب کے ساتھ یکساں سلوک کریں ، امانت میں خیانت نہ کریں، غروروگھمنڈ میں مبتلا ہونے کے بجائے سب سے یکساں سلوک کریں اورخود کو خادم سمجھ کرعوام کی بھرپور خدمت کریں۔