منورحسن کی جانب سے طالبان کی وحشت وبربریت کی حمایت انسانیت دشمنی ہے۔ رابطہ کمیٹی ایم کیوایم

کراچی ۔۔۔ 20 فروری 2014ء

متحدہ قومی موومنٹ کی رابطہ کمیٹی نے جماعت اسلامی کے امیرمنورحسن کی جانب سے طالبان کی حمایت میں کی جانے والی پریس کانفرنس پر تبصرہ کرتے ہوئے کہاہے کہ طالبان کی وحشت وبربریت کی حمایت انسانیت دشمنی ہے۔ رابطہ کمیٹی نے کہاکہ طالبان دہشت گردفوج ، پولیس اور شہریوں پر خودکش حملے کررہے ہیں ، ان کے خون سے ہولی کھیل رہے ہیں، طالبان نے فوج کے جواں سال میجر جہانزیب کوشہید کردیا لیکن منور حسن کواس پر کوئی دکھ نہیں ہوا، حتیٰ کہ طالبان دہشت گردوں نے اپنی قید میں موجود ایف سی کے جوانوں کو انتہائی بیدردی سے ذبح کردیا اور ان کی سربریدہ لاشوں کوسڑک پرگھسیٹا لیکن منورحسن اس درندگی اور وحشت وبربریت کی مذمت کرنے سامنے نہیں آئے اور منصورہ میں آرام سے بیٹھے رہے لیکن آج جب پاک فوج نے ان سفاک دہشت گردوں کے خلاف کارروائی کی ہے تومنورحسن سراپااحتجاج ہوگئے ہیں اور پریس کانفرنس کرکے فوج کی کارروائی پرفوج اورحکومت کو شدید تنقیدکانشانہ بنارہے ہیں،جب فوجی جوانوں کے گلے کاٹے گئے تومنورحسن کوسانپ سونگھا ہوا تھا لیکن آج جب فوج نے کارروائی کی ہے تو منورحسن اسے ظلم قراردے رہے ہیں۔منورحسن کے اس طرزعمل نے ثابت کردیا ہے کہ منور حسن اورجماعت اسلامی دراصل اسلام، پاکستان اورانسانیت کے حامی نہیں بلکہ اسلام اورپاکستان کے دشمن طالبان اورانکی درندگی، وحشت و بربریت اور انسانیت دشمنی کے ساتھ ہیں۔رابطہ کمیٹی نے کہاکہ اسلام کی سچی تعلیمات اور احترام انسانیت پر یقین رکھنے والے تمام پاکستانیوں کو چاہیے کہ وہ منورحسن اورجماعت اسلامی کے اس گھناؤنے طرزعمل کانوٹس لیتے ہوئے ان منورحسن اوران جیسے تمام لوگوں کاسوشل بائیکاٹ کریں اور انسانیت دشمنوں کے خلاف کارروائی میں مسلح افواج کا بھرپور ساتھ دیں ۔