یہ انٹربورڈ کے متعصب افسران کی جانب سے دانستہ دھاندلی اورفراڈ ہے جس کامقصد کراچی کے طلبہ کاتعلیمی قتل ہے۔الطاف حسین

لندن ۔۔۔15،جنوری 2024ئ

متحدہ قومی موومنٹ کے بانی وقائدجناب الطاف حسین نے کراچی انٹربورڈ کے امتحانات کے نتائج میں کراچی کے طلبہ کے ساتھ سنگین بے قاعدگیوں پر سخت تشویش کااظہارکرتے ہوئے مطالبہ کیاہے کہ انٹرمیڈیٹ بورڈ کراچی کے تحت پری میڈیکل اور پری انجینئرنگ کے امتحانی نتائج کالعدم قراردیے جائیں اورکراچی کے طلباء وطالبات کاتعلیمی قتل عام بند کیاجائے ۔ اپنے بیان میںجناب الطاف حسین نے کہاکہ یہ انتہائی حیرت انگیز معاملہ ہے کہ کراچی کے جن ہونہار طلبہ وطالبات نے اپنی محنت کی بنیادپر میٹرک میں 80سے 90فیصد نمبر حاصل کئے تھے انٹرمیڈیٹ کے امتحانات کے نتائج میں ان کے نمبر 40فیصد آئے ہیں۔ ایساکیساممکن ہوسکتاہے؟ یہ بورڈآف انٹرمیڈیٹ کے متعصب افسران کی کوئی غلطی نہیں بلکہ ایک دانستہ دھاندلی اورفراڈ ہے جس کامقصد کراچی کے طلبہ کاتعلیمی قتل ہے ۔ جناب الطا ف حسین نے کہاکہ انٹربورڈ کے ان فراڈ رزلٹ سے صاف ظاہر ہے کہ انٹربورڈ کے متعصب افسران کی جانب سے باقاعدہ منظم سازش کے تحت کراچی کے باصلاحیت اور ہونہار طلباء کا تعلیمی مستقبل تباہ کیاجارہا ہے جس کے باعث کراچی کے طلباوطالبات پرامن احتجاج کررہے ہیں جبکہ بعض طلباوطالبات اس ناانصافی کے خلاف خودکشی تک کرنے پر مجبور ہیں۔جناب الطاف حسین نے کہاکہ کراچی کے نوجوانوں کے سیاسی ومعاشی قتل کے بعد کراچی کے طلبہ وطالبات کاتعلیمی قتل کیاجارہاہے۔مگر کراچی کو منی پاکستان قراردینے اور کراچی کے شہریوں کے غم میں مگرمچھ کے آنسو بہانے والی سیاسی ومذہبی جماعتیں کراچی کے طلباوطالبات کے

 ساتھ اس کھلی دھاندلی اورناانصافی پر اظہارمذمت تک کرنے سے گریزاں ہیں جوافسوسناک ہے ۔ جناب الطاف حسین نے مطالبہ کیاکہ میں اورمیری ایم کیوایم ،کراچی انٹربورڈ کی دھاندلیوں اور میرٹ کے قتل سے متاثرہ طلباوطالبات کے ساتھ ہے اور متاثرہ طلباوطالبات کے ساتھ کئے جانے والے اس کھلے ظلم کے خلاف ہے ۔ انہوں نے مطالبہ کیاکہ انٹربورڈ کے ان فراڈرزلٹ کوفی الفور کالعدم قراردیاجائے ، طلبہ کے امتحانی نتائج دوبارہ مرتب کئے جائیں،کراچی کے طلبہ کے ساتھ ناانصافی بند کی جائے اورکراچی بورڈآف انٹرمیڈیٹ کے نااہل افسران کے خلاف کارروائی کی جائے ۔

٭٭٭٭٭