صوبائی محکمہ خزانہ کی جانب سے کراچی کی خواتین کالجز کی اسٹنٹ پروفیسر کی 50سے زائد اسامیاں اندرون سندھ حیدرآباد منتقل کرنے پر رابطہ کمیٹی کااظہار مذمت

کر اچی ۔۔۔۔5اگست 2016ء 

متحدہ قومی موومنٹ کی رابطہ کمیٹی نے صوبائی محکمہ خزانہ کی جانب سے کراچی کی خواتین کالجز کی اسٹنٹ پروفیسر کی 50سے زائد اسامیاں اندرون سندھ حیدرآباد منتقل کرنے کی شدید مذمت کی ہے اور کہا ہے کہ اندرون سندھ کی بااثر خواتین کی خواہش پر اسامیاں منتقل کرنا کراچی کے تعلیمی اداروں کا مستقبل تاریک کرنے کے مترادف ہے ۔ ایک بیان میں رابطہ کمیٹی نے کہاکہ حیدرآباد کے کالجوں میں اساتذہ کی تعداد زیادہ ہونے کے باوجود کراچی سے خواتین کالجز کی اسٹنٹ پروفیسر کی 50سے زائد اسامیاں حیدرآباد منتقل کرنا پیپلزپارٹی کی سندھ حکومت کا ایک اور متعصبانہ اقدام ہے جس کی جتنی بھی مذمت کی جائے کم ہے ۔ رابطہ کمیٹی نے کہاکہ ہونا تو یہ چاہئے تھا کہ کراچی کے کالجز میں اساتذہ کی کمی کو پورا کیاجاتا اور میرٹ پر فیصلے کئے جاتے لیکن افسوس کہ ماضی کی طرح نئے وزیراعلیٰ سندھ مراد علی شاہ کی موجودگی میں بھی پیپلزپارٹی کی صوبائی کابینہ کھلے عام مہاجر دشمن اقدامات کررہی ہے اور میرٹ کو ترجیح دینے کے بجائے تعصب اور نفرت کے بیج بو رہی ہے ۔ رابطہ کمیٹی نے کہاکہ پیپلزپارٹی کے سابق صوبائی وزیر تعلیم سندھ پیر مظہر الحق کے دور میں بھی کراچی کے کالجوں میں نچلے گریڈ کے غیر تدریسی ملازمین تعینا ت کئے گئے تھے جن میں سے 70فیصد ملازمین کو بھرتی کے خطوط پہلے ملنا اور ان کے ڈومیسائل ، پی آر سی بعد کی تاریخوں کے ہونا سراسر کھلی کرپشن ہے اور کراچی کے نوجوانوں کے حق اور ان کی ملازمتوں پر ڈاکا ڈالنے کا عمل ہے ۔ رابطہ کمیٹی نے وزیراعظم نواز شریف اور وزیراعلیٰ سندھ مراد علی شاہ سے مطالبہ کیا کہ کراچی کی خواتین کالجز کی اسٹنٹ پروفیسر کی 50سے زائد اسامیاں اندرون سندھ حیدرآباد منتقل کرنے کا سنجیدگی سے نوٹس لیاجائے ، ان کی فی الفور کراچی میں تعیناتی کے احکامات جاری کئے جائیں اور صوبائی کابینہ سندھ کے وزراء کو مہاجر دشمن اقدامات سے باز رکھاجائے اور اہلیا ن کر اچی گو رنر سندھ سے بھی مطالبہ کر تے ہے کہ وہ اب خا مو شی کا قفل تو ڑیں اور کر اچی دشمن اقداما ت پر اپنے اختیارات کا استعما ل کر یں ورنہ اہلیان کر اچی پر ہو نے والے ظلم وستم پر اپنے عہدہ سے احتجاججا استعفے دیدیں ۔