لاکھوں روپے ٹیکس ادائیگی کے بعد بھی ڈیفنس اور کلفٹن کے اکثر علاقوں میں پانی کی لائنوں میں پانی کا ایک قطرہ بھی موجود نہیں
پانی کی قلت ڈیفنس کلفٹن کا دیرینہ مسئلہ ہے، کوجنٹ پلانٹ کو کباڑی بھی خریدنے کو تیار نہیں
ڈیفنس کلفٹن میں ٹینکر مافیا کا راج ہے، ایسا محسوس ہوتا ہے کہ عوام کو لوٹنے کے لیے ٹینکر مافیا کو کھلی چھوٹ دے دی گئی ہے
DHAپانی کی ترسیل کی بجائے RO پلانٹ کے ذریعے پانی فروخت کرکے ڈیفنس کلفٹن کے مکینوں کا استحصال کررہی ہے
ڈیفنس کلفٹن ریزیڈینس کمیٹی، کونسل آف پروفیشنلز اور ایمیٹی انٹرنیشنل کے مشترکہ اجلاس میں شرکاء کا تبادلہ خیال
کراچی ۔۔۔ 10، جولائی 2016ء
ڈیفنس کلفٹن ریزیڈینس کمیٹی، کونسل آف پروفیشنلز اور ایمیٹی انٹرنیشنل کا ایک مشترکہ اجلاس گزشتہ روز ڈیفنس ہاؤسنگ اتھارٹی میں منعقد ہوا۔ اجلاس میں حق پرست رکن سندھ اسمبلی و صدر ایمیٹی انٹرنیشنل ڈاکٹر محفوظ یار خان ایڈوکیٹ، ڈیفنس کلفٹن ریزیڈینس کمیٹی کے اراکین امجد اللہ خان ، اختر بلگرامی، بدر الدین خان، عمرانہ بیگ، پروین بدر، سیف اللہ خان، مظہر بیگ، ہما نوید، انور سرجیکل اور صدر کونسل آف پروفیشلز طہٰ احمد خان نے شرکت کی۔ شرکاء نے تبادلہ خیال کرتے ہوئے کہا کہ پانی کی قلت کا مسئلہ کراچی میں شدت اختیار کرگیا ہے جس سے ڈیفنس کلفٹن رہائشی بھی شدید متاثر ہورہے ہیں۔ انہوں نے کہا کہ ڈیفنس کلفٹن کے رہائشوں کی جانب سے ہر ماہ کروڑوں روپے کلفٹن کنٹونمنٹ بورڈ کو واٹر ٹیکس کی مد میں ادا کئے جاتے ہیں لیکن اس کے باوجود رہائشی پانی کی بوند بوند کو ترس چکے ہیں۔ انہوں نے کہا کہ پانی کی قلت کے باعث عوام 12 ہزار روپے فی ٹینکر پانی خریدنے پر مجبور ہیں اور اس وجہ سے ٹینکر مافیا سرگرم ہے اور یوں معلوم ہوتا ہے کہ ٹینکر مافیا کو کھلی چھوٹ دے دی گئی ہے۔ انہوں نے کہا کہ ڈیفنس ہاؤسنگ اتھارٹی پانی کی ترسیل کی بجائے RO پلانٹ کے ذریعے پانی جیسی بنیادی ضرورت فروخت کرکے ڈیفنس کلفٹن کے مکینوں کا استحصال کررہی ہے ۔ انہوں نے کہا کہ DHA انتظامیہ کی جانب سے کوجنٹ پلانٹ کا دھوم دھام سے افتتاح تو کیا گیا مگر کمیشن کی بندر بانٹ کے بعد اس پلانٹ کو کباڑی بھی خریدنے کو تیار نہیں۔ اجلاس میں متفقہ طور پر فیصلہ کیا گیا کہ اس سلسلے میں ایک میمورینڈم کور کمانڈر ، اسٹیشن ماسٹر ،ایڈ منسٹریٹر DHA، کنٹونمنٹ ایگزیکٹیو آفیسر اور دیگر متعلقہ حکام بالا کو بھیجا جائے گا اور ایک مشترکہ وفد بدھ کو کلفٹن کنٹونمنٹ بورڈ کا دورہ کرکے انھیں اپنی تجاویز پیش کرے گا۔ اپنے ایک مشترکہ بیان میں انہوں نے کہا کہ مؤرخہ15، جولائی 2016ء بروز جمعہ شام 6 بجے دو تلوار پر واقع ڈیفنس کلفٹن ریزیڈینس کمیٹی کے دفتر پر اہم اجلاس منعقد کیا جائے گا جس میں اس سلسلے میں آئندہ کا لائحہ عمل طے کیا جائیگا ساتھ ہی انہوں نے ڈیفنس کلفٹن کے رہائشیوں سے اس اجلاس میں شرکت کی درخواست کی۔