حضرت امجدصابری ؒ کے ایصال ثواب کیلئے ایم کیوایم کے زیراہتمام انٹرنیشنل سیکریٹریٹ لندن میں قرآن خوانی کی گئی

لندن ۔۔۔ 27 جون 2016ء

برصغیرکے ممتازصوفی قوال حضرت امجدصابری ؒ کی روح کے ایصال ثواب کے لئے ایم کیوایم کے زیراہتمام انٹرنیشنل سیکریٹریٹ لندن میں قرآن خوانی کی گئی اور امجدصابری شہیدؒ کو زبردست خراج عقیدت پیش کیاگیا۔ قرآن خوانی میں ایم کیوایم کی رابطہ کمیٹی کے ارکان، ایم کیوایم یوکے کے ذمہ داران وکارکنان ،انکے اہل خانہ، خواتین اوربچوں نے شرکت کی ۔ اس موقع پراظہارخیال کرتے ہوئے متحدہ قومی موومنٹ کی رابطہ کمیٹی کے کنوینرندیم نصرت نے امجدصابری شہید ؒ کوزبردست خراج عقیدت پیش کرتے ہوئے کہاکہ امجدصابری کی شہادت ایک قومی سانحہ ہے ، یہ ایسانقصان ہے جس کی تلافی نہیں ہوسکتی ۔ انہوں نے کہاکہ امجدصابری شہید ؒ نے اپنے اجداد سے ملنے والے فن قوالی کونہ صرف زندہ رکھابلکہ اسے آگے بڑھایا۔ انہوں نے کہاکہ قوالی ہماری ثقافت کاحصہ ہے اورامجدصابری شہید ؒ فن قوالی کے ذریعے نہ صرف صوفیائے کرام کے پیغام کوپھیلارہے تھے بلکہ ہماری ثقافت کوبھی دنیابھرمیں روشناس کررہے تھے ۔ دشمنوں نے امجدصابری کوشہیدکرکے ہم سے ہمارے فن و ثقافت کی ایک بڑی علامت کوچھین لیاہے۔ ندیم نصرت نے کہاکہ ایک ایک کرکے ہمارے ہیروز اورہماری بڑی شخصیات کوچھیناجارہاہے ، ہمارے دانشوروں، مفکروں، فنکاروں، صحافیوں، عالموں، پروفیسروں اوردیگراہم شخصیات کو چن چن کرشہیدکیاجارہاہے ۔ ندیم نصرت نے کہاکہ امجدصابری شہیدؒ کوخیابان سحروالوں کی جانب سے دھمکیاں مل رہی تھیں جس کااظہارانہوں نے کئی لوگوں سے کیاتھا۔ امجدصابری شہیدنے حکومت کوبھی سیکوریٹی فراہم کرنے کی درخواست کی تھی لیکن حکومت نے اس پر کوئی توجہ نہیں دی۔ انہوں نے مطالبہ کیاکہ امجد صابری شہیدؒ کے قتل کی آزادانہ تحقیقات کرائی جائے اورقاتلوں کوگرفتارکرکے سخت سے سخت سزادی جائے ۔ 







تصاویر