ملکی و بین الاقوامی شہرت یافتہ معروف قوال امجد صابری شہید کو آج ہزاروں سوگواروں کی آہوں اور سسکیوں کے درمیان پاپوش نگر کے قبرستان میں سپرد خاک کردیاگیا

کراچی ۔۔۔23، جون 2016ء 

ملکی و بین الاقوامی شہرت یافتہ معروف قوال امجد صابری شہید کو آج ہزاروں سوگواروں کی آہوں اور سسکیوں کے درمیان پاپوش کے قبرستان میں سپرد خاک کردیاگیا ۔ امجد صابری شہید کی نماز جنازہ لیاقت آباد ارم بیکری کے مین روڈ پر ادا کی گئی ۔ اس موقع پر فضا سوگوار تھی اور ہر آنکھ اشکبار تھی، علاقے کی تمام دکانیں اور مارکیٹیں رضاکارانہ طور پر سوگ میں بند تھی ، عوام نے امجد صابری شہید کے سوگ میں اپنے ہاتھوں اور ماتھوں پر سیاہ پٹیاں باندھی ہوئی تھیں اور وہ مسلسل کلمہ طیبہ کا ورد کررہے تھے ۔ چورنگی ، عمارتوں پر سیاہ پرچم اور بینرز بھی آویزاں تھے اور لوگ امجد صابری کے آخری دیدار کیلئے بے چین اور بے تاب دکھائی دیئے ۔ شہید کے جلوس جنازہ کا ایک سرا لیاقت آباد نمبر 4پر اور دوسرا ناظم آباد نمبر 7سے بھی آگے تک دکھائی دیا ۔ امجد صابر ی شہید کی تجہیز و تکفین کے انتظامات ایم کیوایم لیاقت آباد ٹاؤن نے کئے جو شہید کی نماز جنازہ اور تدفین بعد بھی شہید کے عزیز واقارب کے ہمراہ موجود رہے ۔ امجد صابری شہید کی نمازجنازہ اور تدفین میں مختلف سیاسی ، سماجی ، مذہبی شخصیات ، فنکاروں ، علمائے کرام ، نعت خواں ، قوال حضرات ، وکلاء سمیت مختلف شعبہ ہائے زندگی سے تعلق رکھنے والے افراد کے علاوہ ایم کیوایم کی رابطہ کمیٹی کے سینئر ڈپٹی کنوینر ڈاکٹر فاروق ستار ، ڈپٹی کنوینر ز کیف الوریٰ ، کنو ر نوید جمیل ، رابطہ کمیٹی کے اراکین ، سندھ اسمبلی میں قائد حزب اختلاف خواجہ اظہار الحسن ،نامزد میئر وسیم اختر ، ڈپٹی میئر ارشد وہرا ، ، اراکین قومی وصوبائی اسمبلی ، منتخب بلدیاتی نمائندے ، ایم کیوایم سینٹرل ایگزیکٹو کونسل کے اراکین ، نائن زیرو کے مختلف شعبہ جات کے ذمہ ادران ، ٹاؤنز اور یوسیز کے ذمہ داران و کارکنان ، ہمدردوں اور شہید کے عزیز واقارب نے ہزاروں کی تعداد میں شرکت کی ۔ دریں اثناء ایم کیوایم کی رابطہ کمیٹی کی رکن محترمہ ذرین مجید نے ایم کیوایم شعبہ خواتین کی اراکین اور حق پرست خواتین اراکین اسمبلی کے ہمراہ شہید کی رہائشگاہ جاکر سوگوار اہل خانہ سے دلی تعزیت وہمدردی کااظہار کیا اور انہیں صبر کی تلقین کی ۔