سانحہ صفورا چورنگی اور دہشت گردی کے دیگر واقعات میں ملوث دہشت گردوں کی گرفتاری پر کراچی پولیس، سندھ حکومت اور دیگر اعلیٰ سول حکام کو زبردست مبارکباد اور خراج تحسین پیش کرتا ہوں، الطاف حسین

لندن۔۔۔21مئی 2015ء 

متحدہ قومی موومنٹ کے قائد جناب الطاف حسین نے کراچی میں سانحہ صفورا چورنگی ، سبین محمود کے قتل اوردہشت گردی کے دیگر واقعات میں ملوث دہشت گردوں کی گرفتاری پر کراچی پولیس، سندھ حکومت اور دیگر اعلیٰ سول حکام کو زبردست مبارکباد اور خراج تحسین پیش کیا ہے ۔ رابطہ کمیٹی کے ارکان سے ٹیلی فون پر گفتگو کرتے ہوئے جناب الطاف حسین نے سفاک دہشت گردوں کی گرفتاری پر سب سے پہلے اللہ تعالیٰ کا شکر ادا کیا ۔ انہوں نے کہاکہ کراچی میں اسماعیلی کمیونٹی کے افراداور سماجی رہنما سبین محمودسمیت معصوم ڈاکٹرز، انجینئرز ، پروفیسرز، بوہری برادری اور علمائے کرام کے بہیمانہ قتل اورامریکی پروفیسر ڈیبرا لوبوپر قاتلانہ حملے کے واقعات میں ملوث انتہائی خوفناک دہشت گرد گروپ کے ارکان کی گرفتاری کراچی پولیس کا تاریخی کارنامہ ہے ۔ انہوں نے کہاکہ کراچی پولیس کے افسران اور اہلکار، رات دن محنت ولگن اور اپنی جانوں کو ہتھیلی پر رکھ کر بہادری کے ساتھ سفاک قاتلوں کی تلاش اور انہیں گرفتارکرنے کی کوششوں میں مصروف تھے اور اللہ تعالیٰ کے کرم سے انہیں اپنی اس نیک کوشش میں کامیابی حاصل ہوئی ۔ جناب الطاف حسین نے کہاکہ سانحہ صفورا چورنگی اوردیگر بڑے واقعات میں ملوث سفاک دہشت گردوں کی گرفتاری سے اللہ تعالیٰ نے کراچی پولیس کوجواعزاز عطا کیا ہے اس پر پوری قوم بالخصوص کراچی پولیس کے افسران اور اہلکاروں کو شکرانے کے نفل ادا کرنے چاہئیں ۔ جناب الطاف حسین نے کہاکہ سفاک دہشت گرد کئی برسوں سے کراچی میں معصوم وبے گناہ اسماعیلی برادری ، بوہری برادری ، شیعہ وسنی ڈاکٹروں ، اساتذہ اور سنی وشیعہ علمائے کرام سمیت دیگر بے گناہ افراد کے وحشیانہ قتل کی کارروائیاں کررہے تھے اور قانون کی گرفت سے محفوظ تھے بالآخر ان سفاک دہشت گرد قاتلوں کی گرفتاری کا سہرا کراچی پولیس کے سربندھا ۔ جناب الطاف حسین نے اپنی اور رابطہ کمیٹی کے تمام ارکان کی جانب سے کراچی پولیس کے افسران واہلکاروں، وزیراعلیٰ سندھ سید قائم علی شاہ اور دیگر سول حکام کو شاندارکامیابی پر زبردست مبارکباد اور خراج تحسین پیش کیا۔
English

وڈیو