سانحہ عباس ٹاؤن اور بادامی باغ کے خلاف لندن میں کامیاب مظاہرے پر ایم کیوایم برطانیہ کے کارکنوں کو الطاف حسین کا خراج تحسین

لندن میں مردوں ، خواتین اور بزرگوں حتیٰ کہ چھوٹے چھوٹے بچوں نے برفانی ہواؤں کے باوجود تین گھنٹے تک مظاہرہ کرکے سانحات کے متاثرین کے ساتھ دلی یکجہتی کا اظہار کیا۔مظاہرے کی کوریج پر صحافی برادری اور الیکٹرانک میڈیا کے نمائندوں سے اظہار تشکر۔

لندن۔۔۔11،مارچ 2013ء

متحدہ قومی موومنٹ کے قائد جناب الطاف حسین نے سانحہ عباس ٹاؤن کراچی اور بادامی باغ لاہور کے خلاف لندن میں کامیاب مظاہرے پر ایم کیوایم برطانیہ کے ذمہ داروں، کارکنوں اور برطانیہ میں مقیم پاکستانیوں کو زبردست خراج تحسین پیش کیا ہے ۔ ایک بیان میں جناب الطاف حسین نے کہاکہ لندن میں برطانیہ کے وزیراعظم کی رہائش گاہ کے باہر مردوں ، خواتین اور بزرگوں حتیٰ کہ چھوٹے چھوٹے بچوں نے شدید سردی اوربرفانی ہواؤں کے باوجود جس گرم جوشی اور جذبے کے ساتھ تین گھنٹے تک مظاہرہ کرکے سانحہ عباس ٹاؤن کراچی اور سانحہ بادامی باغ لاہور کے متاثرین کے ساتھ دلی یکجہتی کا اظہار کیا جس پر مظاہرے میں شریک ایک ایک فرد زبردست خراج تحسین کا مستحق ہے ۔ جناب الطاف حسین نے مظاہرے کی کوریج پر صحافی برادری اور الیکٹرانک میڈیا کے نمائندوں کا بھی شکریہ ادا کیا۔