سانحہ عباس ٹاؤن کے متاثرین کی امدادکے سلسلے میں کوئی کسرنہ اٹھارکھی جائے۔الطاف حسین کی رابطہ کمیٹی کوہدایت

لندن ۔۔۔5 مارچ2013ء

متحدہ قومی موومنٹ کے قائدجناب الطا ف حسین نے ایم کیوایم کی رابطہ کمیٹی کوسختی سے ہدایت کی ہے کہ وہ سانحہ عباس ٹاؤن کے متاثرین کی زیادہ سے زیادہ مددکریں اورمتاثرین کی امدادکے سلسلے میں کسی بھی قسم کی کوئی کسرنہ اٹھارکھیں۔ انہوں نے یہ بات منگل کی شب ایم کیو ایم کے مرکز نائن زیروپررابطہ کمیٹی سے گفتگوکرتے ہوئے کہی۔ جناب الطا ف حسین نے کہاکہ کراچی کے عباس ٹاؤن پر قیامت صغریٰ ٹوٹی ہے جس میں پچاس سے زائدافراد شہید اورسوسے زائد زخمی ہوگئے جبکہ سینکڑوں فلیٹس مکمل طورپر تباہ ہوگئے ہیں جن کے مکین اپنی عمربھر کی پونچی سے محروم ہوکربے گھرہوچکے ہیں۔ انہوں نے رابطہ کمیٹی کو ہدایت کی کہ سانحہ عباس ٹاؤن کے متاثرین کی ہرطرح سے مددکریں،زخمیوں کے علاج معالجہ پربھرپورتوجہ دی جائے اورمتاثرین کی امداد کے سلسلے میں ایم کیوایم کے کارکنان وذمہ داران اورخدمت خلق فاؤنڈیشن کے رضاکارمزیدمحنت ولگن سے کام کریں۔ اس موقع پر رابطہ کمیٹی نے جناب الطاف حسین کوسانحہ کے متاثرین کیلئے ایم کیوایم کی جانب سے عباس ٹاؤن میں قائم کئے جانے والے امدادی کیمپ،عباس ٹاؤن کے دورے اوردیگرامدادی سرگرمیوں کی تفصیلات سے آگاہ کیا۔