نام نہاد سیاسی و مذہبی جماعتیں اپنے ہی خاندان کے افراد کو ملک کے منتخب ایوانوں میں بھیج کر موروثی سیاست کو فروغ دیتی آئی ہیں، حق پرست ارکان قومی وصوبائی اسمبلی

کراچی ۔۔۔03، مارچ2013ء 

متحدہ قومی موومنٹ کے زیر اہتمام عام انتخابات برائے 2013ء کے سلسلے میں بھرپور انتخابی عوامی رابطہ مہم اور اجتماعات کا سلسلہ جاری ہے ۔ اس سلسلے میں گزشتہ روز ایم کیوایم نارتھ ناظم آباد سیکٹر کے زیراہتمام بفرزون ، اسکیم 33سیکٹر کے تحت گلزار ہجری میں واقع کنٹری ٹاور ، گلشن اقبال سیکٹر کے زیراہتمام سنی ہائٹس ، روفی سینٹر بلاک 13-D-2اور بلاک 13-D، ایم کیوایم لیاقت آباد سیکٹر کے زیر اہتمام لیاقت نمبر 1اور 2کے درمیانی روڈ جبکہ ایم کیوایم شاہ فیصل سیکٹرکے تحت بھی عوامی رابطہ مہم کے سلسلے میں بڑے اجتماعات منعقد ہوئے جن میں نوجوانوں ،بزرگوں ، خواتین اور مختلف برادریوں اور مکتبہ فکر سے تعلق رکھنے والے افراد نے بہت بڑی تعداد میں شرکت کی ۔ عوامی اجتماعات سے حق پرست اراکین قومی وصوبائی اسمبلی سفیان یوسف ،شیخ صلاح الدین، ندیم ہاشمی ، اظہار الحسن ، جمال خان ، فیصل سبزواری ، ندیم مقبول ، مزمل قریشی ، نشاط محمد ضیاء ، انور عالم اور سابق حق پرست رکن قومی اسمبلی حیدر عبا س رضوی نے خطاب کیا ۔اجتماعات سے خطاب میں مقررین نے کہاکہ ایم کیوایم واحد جماعت ہے جس نے غریب ومتوسط طبقے کے پڑھے لکھے اور باصلاحیت نوجوانوں کو ملک کے منتخب ایوانوں میں پہنچایا جبکہ دیگر سیاسی و جماعتوں نے اپنی جماعت کے غریب کارکنوں کو نظر انداز کیا ہے اور اپنے ہی خاندان کے افراد کو ملک کے منتخب ایوانوں میں بھیج کر موروثی سیاست کو فروغ دیا ہے ۔ انہوں نے کہاکہ ایم کیوایم ملک میں برسوں سے رائج فرسودہ جاگیردارانہ نظام اور موروثی سیاست کے خلاف ہے اور اس کے خاتمے کی عملی جدوجہد کررہی ہے اوریہی وجہ ہے کہ ملک کی دیگر نام نہاد سیاسی ومذہبی جماعتیں جو موروثی سیاست اور فرسودہ جاگیردارانہ نظام کی حامی ہیں ایم کیوایم کے خلاف بے بنیاد پروپیگنڈے اور سازشوں میں مصروف ہیں ۔ انہوں نے کہاکہ قافلہ حق پرستی قائد تحریک جناب الطاف حسین کی قیادت میں تمام تر سازشوں اور رکاوٹوں کے باوجود اسی طرح جاری و ساری رہے گا اور انشاء اللہ وہ دن دور نہیں جب یہ قافلہ حق پرستی موروثی سیاست اور فرسودہ جاگیردارانہ نظام کا ملک سے خاتمہ کرکے غریب و متوسط طبقے کے انقلاب کی راہ ہموار کرے گا ۔ حق پرست اراکین قومی و صوبائی اسمبلی نے اجتماعات کے شرکاء سے اپیل کی کہ وہ ابھی سے ہی عام انتخابات کی تیاریاں شروع کردیں اور عام انتخابات میں حق پرست امیدواروں کو بھاری اکثریت سے کامیاب کرائیں ۔